Trump njoftoi ndërtimin e fabrikës gjigante të çelikut në Iowa: Më e madhe e në historinë e SHBA-së

Presidenti amerikan Donald Trump ka njoftuar ndërtimin e një fabrike gjigante çeliku në Iowa, një projekt që sipas tij do të sjellë mijëra vende pune dhe një investim prej 18 miliardë dollarësh. Njoftimi vjen pak javë para zgjedhjeve të Kongresit në SHBA.

Trump njoftoi të hënën ndërtimin e saj dhe e përshkroi si fabrikën më të madhe të çelikut në historinë e Shteteve të Bashkuara. Projekti do të udhëhiqet nga kompania Mesabi Metallics dhe do të ndërtohet në Iowa, në pjesën qendrore të SHBA-së. Sipas Trump, investimi total pritet të arrijë në 18 miliardë dollarë.

Gjatë prezantimit në Zyrën Ovale, presidenti amerikan deklaroi se projekti do të krijojë rreth 6,000 vende pune gjatë fazës së ndërtimit, ndërsa më pas pritet të gjenerojë rreth 2,000 vende pune në industrinë e çelikut. Trump e paraqiti investimin si dëshmi të forcës së ekonomisë amerikane, duke deklaruar se gjendja ekonomike e vendit është më e mirë se kurrë.

Njoftimi vjen në një periudhë të rëndësishme politike për administratën republikane, vetëm disa javë përpara zgjedhjeve të Kongresit. Trump fitoi Iowa-n në zgjedhjet presidenciale të vitit 2024, por republikanët përballen me një garë më të ndërlikuar në zgjedhjet e mesit të mandatit.

Kandidatja republikane për Senatin nga Iowa, Ashley Hinson, e cila aktualisht shërben në Shtëpinë e Bardhë, përballet me kandidaten demokrate dhe sipas sondazheve të cituara, ndodhet pas saj në garë. Në nivel kombëtar, zgjedhjet e 3 nëntorit pritet të jenë një sfidë e rëndësishme për partinë në pushtet.

Disa parashikime elektorale kanë vlerësuar se demokratët mund të marrin shumicën në Dhomën e Përfaqësuesve, ndërsa gara për Senatin pritet të jetë veçanërisht e fortë. Të 435 vendet e Dhomës së Përfaqësuesve janë në garë, ndërsa kontrolli i Senatit do të varet nga rezultatet në një numër shtetesh ku gara konsiderohet konkurruese.