Profesori i njohur amerikan i ekonomisë, Steve Hanke, ka reaguar lidhur me revoltën studentore në Shqipëri, duke bërë thirrje t&...
EDITORIAL
Dorëheqja- Monolog nga Florian Binaj
PiranjatPërditësimi i fundit 5 Dhjetor 2025, 21:30
Nga Florian Binaj
Prej ditësh po dëgjojmë një refren të ri: “SPAK-u po na fut në krizë qeverisjeje”. Jo. SPAK-u thjesht po ngre qepenin, dhe ne po shohim në dritën e diellit atë që ka qenë aty prej vitesh. Kriza e vërtetë nuk vjen nga drejtësia, por nga fakti që në këtë vend është zhdukur standardi i dorëheqjes. Të jesh ministër nën akuza të rënda është bërë normale. Të thuash: “Jap dorëheqjen që të përballem me drejtësinë si qytetar i thjeshtë” – kjo, në Shqipërinë “europiane”, është e paimagjinueshme.
Sepse në Shqipëri ndarja nuk është më e majta kundër të djathtës, por “njeriu me pushtet” kundër “njeriut të thjeshtë”. Ata që besojnë se janë “lart” kundër atyre që i konsiderojnë “poshtë”.
Ata “lart” kanë spitalet e tyre, shkollat e tyre, mediat e tyre.
Qytetari i thjeshtë ka radhën në sportele, shërbimet publike skandaloze dhe nëpërkëmbjen e institucioneve. Këtu poshtë, ku jemi ne – shumica dërrmuese – drejtësia është shumë më e ashpër, shumë më shpërfillëse dhe shumë më e ngadaltë sesa me politikanin e njohur, e sidomos me atë që ka ende pushtet.
Prandaj, për ata “lart”, dorëheqja është e paimagjinueshme: nga “lart” mund të përfundosh “poshtë”. Nga bota e parave, pushtetit dhe mundësisë për ta negociuar edhe drejtësinë, mund të përfundosh në ferrin e të qenit askushi. Prandaj karrigia mbahet me dhëmbë, edhe kur SPAK-u të troket te dera. Prandaj z. Veliaj nuk jep dorëheqjen, prandaj znj. Balluku nuk e lëshon karrigen, për t’u përballur me drejtësinë nga maja, jo nga rruga. Sepse shteti që kemi ndërtuar nuk është i barabartë për të gjithë.
Çdo herë që pranojmë që një ministër, një kryebashkiak, një zëvendëskryeministër vazhdon qetësisht punën nën akuza të rënda, ne po pranojmë një shtet ku ligji nuk vlen njësoj, as për ata “lart” dhe as për ne këtu “poshtë”. Prandaj, z. Kryeministër, kjo e folura për “Shqipërinë europiane” tingëllon më cinike se kurrë.
Doni të silleni si europianë? Filloni nga gjëja më minimale europiane, dorëheqja nga posti kur je nën hetim.
Përndryshe, z. Kryeministër, s’jeni duke mbrojtur as pafajësinë e ministrave tuaj të akuzuar për hajdutëri, as “stabilitetin e shtetit”, thjesht po mbroni frikën nga dita kur do të jeni, si të gjithë ne, vetëm qytetarë përpara ligjit./piranjat.news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
