Në fjalën e saj në Komisionin për Evropën dhe Punët e Jashtme, deputetja e PD, Albana Vokshi ka ngritur me tone të forta &cce...
AKTUALITET
EMRI/ E zë poshtë mjeti që po drejtonte, humb jetën tragjikisht 20-vjeçari shqiptar në Itali
PiranjatPërditësimi i fundit 27 October 2026, 19:48
20-vjeçari shqiptar Rogert Ajdini ka humbur jetën tragjikisht pas një aksidenti të rëndë në vendin e punës, mëngjesin e sotëm në Valtopina, në provincën e Peruxhias, Itali. Sipas gazetës italiane "La Nazione", i riu po drejtonte një rul për ngjeshjen e asfaltit, kur mjeti dyshohet se rrëshqiti dhe përfundoi anës rrugës. Nga të dhënat paraprake, dyshohet se 20-vjeçari ka rënë nga mjeti, i cili më pas e ka zënë poshtë me gjithë peshën e tij, duke i shkaktuar plagë fatale.
Shqiptari Rogert Ajdini jetonte në Trevi, në rajonin e Umbrias, së bashku me prindërit dhe vëllain. Ai ishte i punësuar në një kompani që po kryente punime për asfaltimin e një rruge.
Menjëherë pas aksidentit, në vendngjarje mbërritën ekipet e urgjencës mjekësore 118. Pavarësisht ndërhyrjes së shpejtë të personelit shëndetësor, përpjekjet për t'i shpëtuar jetën të riut rezultuan të pasuksesshme. Në vendin e ngjarjes shkuan gjithashtu karabinierët e zonës dhe të komandës së Folignos, së bashku me specialistët e autoritetit shëndetësor lokal, të cilët nisën verifikimet për të përcaktuar rrethanat e aksidentit.Prokuroria e Spoletos ka urdhëruar sekuestrimin e rulit të asfaltit dhe po kryen hetimet e nevojshme për të rindërtuar dinamikën e ngjarjes dhe për të përcaktuar shkaqet që çuan në humbjen e jetës së 20-vjeçarit.
Vdekja e 20-vjeçarit shqiptar ka shkaktuar dhimbje dhe tronditje në komunitetin ku ai jetonte. Gazeta italiane shkruan se, Rogert Ajdini ishte një i ri i dashur dhe i vlerësuar nga njerëzit që e njihnin.
Pas aksidentit, presidentja e rajonit të Umbrias, Stefania Proietti, reagoi publikisht duke shprehur ngushëllimet për familjen, miqtë dhe kolegët e të riut shqiptar.
“Me dhimbje të madhe dhe tronditje të thellë mora lajmin për aksidentin tragjik në punë që ndodhi në Valtopina, ku humbi jetën një djalë vetëm 20 vjeç. Është tronditëse të mendosh se jeta e një të riu mund të ndërpritet ndërsa ai është duke kryer punën e tij”, deklaroi Proietti.
Ajo theksoi se institucionet e Umbrias qëndrojnë pranë familjes së viktimës në këto momente të vështira.
“Në emrin tim personal, të qeverisë rajonale dhe të gjithë komunitetit të Umbrias, dëshiroj t'u shpreh ngushëllimet më të sinqerta familjarëve, miqve dhe kolegëve të punëtorit të ri”, u shpreh Stefania Proietti në deklaratën e saj.
Ndërkohë, autoritetet italiane vijojnë hetimet për të përcaktuar me saktësi se si ndodhi aksidenti që i mori jetën Rogert Ajdinit, ndërsa dinamika e plotë e ngjarjes mbetet ende për t'u sqaruar.
