Real Madridi kërkoi falje të mërkurën pasi sulmuesi i tyre francez, Kylian Mbappe, shkaktoi reagime të ashpra për komentet e tij d...
BOTA
Hakerat godasin Parlamentin italian, në shënjestër edhe emaili i Giorgia Meloni
PiranjatPërditësimi i fundit 27 October 2026, 18:10
Një sulm masiv kibernetik ka goditur ditët e fundit sistemet informatike të Dhomës së Deputetëve të Parlamentit italian, duke vënë në shënjestër edhe adresat elektronike të shumë deputetëve, mes tyre edhe atë të kryeministres Giorgia Meloni, në cilësinë e saj si deputete.
Sipas burimeve parlamentare italiane, sulmi ka prekur të gjithë sistemin informatik të Dhomës së Deputetëve. Megjithatë, specialistët e teknologjisë së informacionit kanë arritur ta mbajnë situatën nën kontroll, ndonëse problemi ende nuk ka marrë zgjidhje përfundimtare.
Burime nga Palazzo Chigi, selia e qeverisë italiane, sqaruan se adresa elektronike e Melonit që është vënë në shënjestër nuk është ajo që kryeministrja përdor për komunikimet zyrtare qeveritare.
Ndërkohë, burime nga Montecitorio, selia e Dhomës së Deputetëve, theksuan se situata nuk përbën emergjencë. “Bëhet fjalë për një çështje që nuk ka karakter emergjent dhe me të cilën përballemi çdo ditë”, deklaruan burimet parlamentare.
Sipas tyre, autoritetet kanë aktivizuar të gjitha masat e nevojshme të mbrojtjes, në bashkëpunim edhe me Agjencinë Kombëtare të Sigurisë Kibernetike (ACN), me të cilën Dhoma e Deputetëve ka një protokoll të posaçëm bashkëpunimi.
Masat e sigurisë mund të përfshijnë edhe çaktivizimin e përkohshëm të disa funksioneve të sistemeve informatike, në përputhje me procedurat standarde të mbrojtjes.
Burimet parlamentare bëjnë të ditur gjithashtu se gjatë ditëve të fundit janë intensifikuar përpjekjet për sulme të ngjashme kibernetike dhe presioni ndaj sistemeve informatike të institucioneve të tjera italiane, evropiane dhe ndërkombëtare.
Deri tani, burimet nuk kanë dhënë informacion mbi autorët e mundshëm të sulmit apo mbi ndonjë komprometim të të dhënave.
