Pak javë më parë ju treguam skemën që ka nisur të aplikohet në masë nga ekzekutivi për të anashkaluar transpar...
AKTUALITET
Hoxha: Brenda policisë pati kundërshti për dhunën, disa njësi nuk iu përgjigjën thirrjeve
PiranjatPërditësimi i fundit 30 October 2026, 19:16
Gazetari Artan Hoxha ka deklaruar se kryeministri Rama e ka përdorur policinë për interesat e tij politike dhe se shpërblimi financiar i paralajmëruar për efektivët që kanë shërbyer gjatë protestave është një mënyrë për t’i vënë ata në shërbim të pushtetit. I ftuar në News 24, gazetari tha gjithashtu se brenda Policisë së Shtetit ka pasur kundërshti për mënyrën se si janë menaxhuar protestat, madje edhe raste kur njësi të caktuara nuk u janë përgjigjur thirrjeve.
Ai paralajmëroi se komunikimet në radio gjatë operacioneve policore janë të regjistruara dhe se, sipas tij, mund të dalin në publik urdhra të tjerë përveç atij “Mos u kurseni”. Artan Hoxha: Rama e ktheu Policinë për interesin e vet. Është Policia e Shtetit shqiptar, jo e Edi Ramës. Por Rama, me atë takim me ata dhe sidomos me atë lloj mënyre “dorovitjeje” që bëri, e trajtoi policinë në këtë mënyrë, kur Policia është më e keqpaguar në vend, më e keqtrajtuara, më e keqpajisura. Sapo e pa në protestë, ai porositi menjëherë automjetet ujëhedhëse.
Pra, papritmas kryeministri kujtohet dhe i çon 8 milionë euro nga paratë e taksapaguesve dhe ua jep si dorovitje për t’i kthyer në mercenarë. Policia ka bërë betimin para flamurit. Ai ua bëri të qartë, vazhdoni, qëndroni, ndaj u dha edhe shpërblimin atyre, sepse pas jush jam unë dhe unë do të shpërblej dhe do të mbështes këdo nga ju që në këto momente më shërben.
Ka pasur presione, sepse unë e di që nga brenda policisë ka pasur kundërshti, ka pasur probleme. Ka ndodhur në disa raste që policia nuk është përgjigjur, ka pasur njësi të caktuara që nuk i janë përgjigjur thirrjes. Do të dalin përgjimet e plota, komunikimet që kanë pasur ata në radio janë të regjistruara. Vetëm një pasazh doli, kur ai thoshte: “Mos u kurseni”. Do të shohim komunikime të tjera që janë më të ashpra se këto. Unë po them që, kur gjetëm radion e urdhrave të 21 Janarit pas 12 vitesh, këto i gjejmë për dy ditë. Këto do të dalin. Për sa i përket vullnetit për të hetuar, ne pamë që nuk ka. Pas çdo proteste, pamë që ekspertët e policisë dhe të kriminalistikës paraqiteshin në vendngjarje me policinë gjyqësore, por aty nuk ishte prokuroria që të hetonte dhunën që ishte “live”. Një oficer policie duhej të ulej para një televizori dhe të dokumentonte çdo ditë me dhjetëra raste të tejkalimit të zbatimit të ligjit nga radhët e policisë.
Pra, kanë qenë aq keq, sa edhe gazin e kanë hedhur në mënyrë të gabuar. Sasia e gazit që përdoret, intensiteti i gazit që u përdor, vendi ku u hodh gazi: nuk mund të hedhësh gaz në lagjet, brenda lagjeve të Tiranës. Aty ka nëna me fëmijë, ka të moshuar. Ka një lloj limiti. Ti e ke parë që gaz u hodh nëpër rrugica.
U kalua te pjesa tjetër, te përdorimi dhe tejkalimi i përdorimit të plumbave të gomës, ku u shkel haptazi rregullorja. Nëse rregullorja e ka përcaktuar qartë që plumbat e gomës, së pari, duhet të identifikosh personin që qëllon, çfarë rreziku shkakton ai për policinë dhe pastaj ta qëllosh në gjymtyrë.
Janë qëlluar nga mesi e lart, është shkelje. Është qëlluar në turmë, në masë. Nëse qëllohet në distanca të papërcaktuara, mund të shkaktojë edhe humbje jete, sepse ka fuqi depërtuese.
