I ati përballet me akuza të rënda, Meghan Markle shfaqet për herë të parë në publik pas arrestimit të tij

Meghan Markle është shfaqur për herë të parë në publik që prej arrestimit të babait të saj, Thomas Markle, i cili akuzohet për posedim të materialeve me përmbajtje abuzimi seksual ndaj fëmijëve. Dukesha e Sussex-it mbërriti në Bruksel së bashku me Princin Harry, duke i shtrënguar dorën gjatë gjithë kohës, por vendosi të mos mbajë fjalimin e parashikuar në Parlamentin Europian.

Çifti mbërriti në Parlamentin Europian rreth orës 09:00 me orën lokale. Meghan, e veshur me një pallto të gjatë dhe të errët, me flokët e kapura, qëndroi pranë bashkëshortit të saj gjatë hyrjes në ndërtesë.

Megjithëse të dy ishin parashikuar të mbanin një fjalim të përbashkët për sigurinë e fëmijëve në internet, Meghan vendosi të mos fliste. Sipas një burimi të cituar nga gazeta “The Telegraph”, ajo nuk ndihej emocionalisht mjaftueshëm e fortë për të dalë përpara publikut në këtë moment.

“Thjesht nuk është emocionalisht mjaftueshëm e fortë për të mbajtur ndonjë fjalim publik tani”, tha burimi.

Një zëdhënës i Meghan konfirmoi se dukesha do ta shoqëronte Harry-n në Bruksel, por nuk do të merrte fjalën gjatë aktivitetit. Gjatë mbërritjes, gazetarët e pyetën disa herë se si po ndihej dhe si po e përballonte situatën familjare, por Meghan nuk dha asnjë përgjigje dhe vazhdoi rrugën së bashku me bashkëshortin.

Ndërkohë Princi Harry mbajti fjalimin e parashikuar, ku u përqendrua te mbrojtja e fëmijëve nga rreziqet në internet dhe përgjegjësia e kompanive të teknologjisë.

“Unë nuk jam këtu si ekspert apo politikan. Jam këtu si baba. Bashkëshortja ime, si nënë”, tha Princi.

Më tej, Harry u shpreh se të gjithë fëmijët duhet të kenë mundësinë të përdorin internetin dhe të zbulojnë gjëra të bukura, pa u ekspozuar ndaj rreziqeve.

“Ata meritojnë të ndihen të sigurt kudo që ndodhen. Në një klasë mësimi. Në një kënd lojërash. Në çdo kohë, pavarësisht se ku janë”, deklaroi ai.

Duka i Sussex-it theksoi gjithashtu se nuk kërkon një botë pa teknologji, por një hapësirë dixhitale ku fëmijët të jenë të mbrojtur.

“Unë nuk po kërkoj një botë pa teknologji. Kjo nuk është e mundur, nuk është ajo që duan të rinjtë dhe sigurisht nuk është ajo që dua unë për fëmijët e mi”, tha Harry. Ai kritikoi gjithashtu kompanitë e rrjeteve sociale për mungesën e transparencës dhe për rreziqet që, sipas tij, platformat e tyre u paraqesin të miturve.

“Mos u vendosni fëmijëve tanë përpara asgjë që nuk do t’ua vendosnit fëmijëve tuaj”, ishte apeli i tij drejtuar kompanive të teknologjisë.

Pas fjalimit të Harry-t, Meghan përqafoi Sandra Spitaels, një nënë që humbi djalin e saj 15-vjeçar, Glenn, i cili i dha fund jetës në vitin 2017 pasi një fotografi nudo e tij u publikua në internet. Dukesha e përqafoi dhe i vendosi dorën në shpinë, duke e ngushëlluar gjatë bisedës mes tyre. Edhe Harry u interesua për gjendjen e saj, duke e pyetur nëse ishte mirë.

Aktiviteti u zhvillua në kuadër të hapjes së instalacionit artistik “Lost Screen Memorial”, i cili nderon fëmijët dhe të rinjtë që kanë humbur jetën pas përvojave të dëmshme në internet. Instalacioni përbëhet nga ekrane në formën e telefonave inteligjentë, ku shfaqen fotografitë e fëmijëve që kanë humbur jetën si pasojë e dëmeve të lidhura me botën dixhitale.

Harry mori pjesë më vonë edhe në një diskutim me titull “Beyond Promises: Building A Digital Future That Works For Children”, ku kërkoi më shumë përgjegjësi nga kompanitë e teknologjisë. Gjatë diskutimit, ai e cilësoi natyrën varëse të rrjeteve sociale si “shpëlarje truri në një shkallë të jashtëzakonshme”. Ai shtoi se çdo person ka përgjegjësinë të mbrojë fëmijët nga rreziqet e platformave dixhitale.

Paraqitja e dukeshës në Bruksel vjen pas arrestimit të babait të saj, Thomas Markle Sr., 82 vjeç, në SHBA. Ai akuzohet për një vepër penale që lidhet me posedimin e materialeve me përmbajtje pornografie me fëmijë. Sipas raportimeve, agjentët e FBI-së sekuestruan materiale nga dy ambiente magazinimi në Los Anxhelos, të cilat ai i kishte marrë me qira për gati dy dekada. Markle u lirua me kusht pas paraqitjes në gjykatë të premten, por iu vendosën masa kufizuese, përfshirë qëndrimin në banesë dhe monitorimin elektronik.

Hetimi nisi pasi djali i tij, Thomas Markle Jr., dyshohet se zbuloi imazhe të paligjshme mes sendeve të të atit në qytetin Cebu të Filipineve dhe njoftoi policinë lokale dhe FBI-në. Meghan, e cila prej vitesh është e shkëputur nga marrëdhëniet me të atin, që para martesës së saj me Harry-n në vitin 2018, ka deklaruar se është “thellësisht e tronditur” nga akuzat ndaj tij.