I riu shqiptar masakroi nënën e tij, kryebashkiaku: Jemi të tronditur, ishte familje e integruar

Një 21-vjeçar shqiptar masakroi nënën e tij në Itali duke e goditur 10 herë më thikë. Krimi ka tronditur mbarë komunitetin shqiptar të kësaj zone

LEGGO

Një 21-vjeçar, Eduart Xhani, ka vrarë me thikë nënën e tij me origjinë shqiptare, Meleqe Lusha (39 vjeçe), në banesën e tyre në rrugën Tagliata Traversa, në Chiari, në provincën e Brescias në Itali. Ngjarja ka ndodhur gjatë natës. Pas krimit, i riu, i lindur në San Bonifacio (Verona), është larguar, por pak më vonë është paraqitur në karabinierinë e Cremonës dhe është dorëzuar.

Në vendngjarje kanë mbërritur karabinierët e kompanisë së Chiarit dhe ata të njësisë hetimore, të cilët po kryejnë verifikimet. Kanë ndërhyrë gjithashtu zjarrfikësit, shërbimi i urgjencës 118 dhe policia bashkiake, e angazhuar për menaxhimin e qarkullimit rrugor. I pranishëm ishte edhe kryetari i bashkisë, Gabriele Zotti. Pritet të mbërrijnë edhe vëllezërit e viktimës.

Kryetari i bashkisë: e pashpjegueshme

“Një ngjarje e pashpjegueshme, që ngre një pikëpyetje të madhe”. Kështu e komenton kryetari i bashkisë së Chiarit, Gabriele Zotti, vrasjen e Meleqe Lushës, 39-vjeçares që u vra me thikë nga djali i saj 21-vjeçar, Eduart Xhani, në banesën e familjes.

I riu, i cili ka ndjekur shkollën në Chiari, sot punonte si punëtor në një fabrikë të zonës. “Është një familje e njohur dhe e integruar në këtë zonë, ku prania e komunitetit shqiptar është e madhe”, shpjegon kryetari i bashkisë.

“Dy vëllezërit e viktimës punojnë në sektorin e ndërtimit dhe janë njerëz shumë punëtorë. Si kryetar bashkie, jam i përfshirë emocionalisht dhe i shpreh solidaritetin tim gjithë familjes, ndërsa presim që hetimet të sqarojnë plotësisht rrethanat e ngjarjes”.

I tronditur është edhe komuniteti shqiptar i Chiarit. “Eduart është një djalë shumë i mirë, i edukuar, serioz: një shembull për komunitetin”, tregon Denis Beqiri, president i shoqatës së shqiptarëve të Chiarit dhe pronar i një agjencie imobiliare.

21-vjeçari ka studiuar në Institutin Einaudi dhe ka kryer praktikën shkollore pikërisht në agjencinë e Beqirit. “Ishte gjithmonë i përpiktë dhe buzagaz, i kujdesshëm; do të kishte pasur një karrierë të mirë”, shpjegon ai. Beqiri e kishte njohur edhe nënën gjatë asaj periudhe: “Një person shumë i mirë, e ka rritur e vetme, së bashku me xhaxhallarët, të cilët kanë qenë gjithmonë pranë tij. Jemi të tronditur, nuk i dimë arsyet e këtij veprimi dhe nuk arrijmë ta kuptojmë: por është i pafalshëm dhe nuk përfaqëson komunitetin tonë”.