Itali/ Mbi 1 mijë euro dhe bizhuteri ari të sekuestruara, arrestohet 32-vjeçari shqiptar, dy bashkëpunëtorët ende në kërkim

Një 32-vjeçar shqiptar ka përfunduar në prangat e policisë italiane3 pasi dyshohet se ishte i përfshirë në dy vjedhje në banesa, në zonat Albano Sant’Alessandro dhe Torre de’ Roveri, në Bergamo.

Ngjarja ka ndodhur mbrëmjen e 29 tetorit, gjatë një operacioni kontrolli të territorit, të organizuar nga karabinierët për parandalimin e vjedhjeve në banesa. Sipas mediave italiane, dy bashkëpunëtorët e tij kanë arritur që të largohen, duke u arratisur nëpër fusha.

Policia kishte identifikuar një automjet të dyshimtë në Albano Sant’Alessandro dhe e kishin ndjekur deri në Torre de’ Roveri. Pas një ndalese pranë fushës sportive, drejtuesi i automjetit kishte marrë në makinë dy persona që vinin nga zonat bujqësore përreth.

Lëvizjet e tyre ngritën dyshime te karabinierët, të cilët kërkuan përforcime nga patrulla e Radiomobile. Sapo panë efektivët, tre personat braktisën automjetin dhe u larguan me vrap drejt fushave.

Dy prej tyre arritën të zhduken, ndërsa 32-vjeçari shqiptar u kap pas një përleshjeje me efektivët. Sipas karabinierëve, ai mbante ende veshur doreza të zeza pune dhe gjatë rezistencës shkaktoi rrëzimin dhe plagosjen e një prej efektivëve. 

Mediat italiane shkruajnë se, gjatë kontrollit, policia gjeti dhe sekuestroi mbi 1 mijë euro para të gatshme, disa bizhuteri ari dhe sende të tjera me vlerë. Gjithashtu, u sekuestruan disa mjete që dyshohet se mund të përdoreshin për vjedhje në banesa, mes tyre kaçavida, pincë prerëse, një majë trapan të modifikuar, dy elektrikë dore, një fleksibël dhe një radio marrëse-dhënëse.

32-vjeçari u arrestua dhe u dërgua në burgun e Bergamos. Pas seancës së vleftësimit të arrestit, gjyqtari i hetimeve paraprake vendosi që ai të qëndrojë në arrest shtëpie, me byzylyk elektronik.

Ndërkohë, hetimet vijojnë për zbardhjen e plotë të ngjarjes dhe identifikimin e vendndodhjen e dy bashkëpunëtorëve të tjerë, të cilët janë ende në kërkim.