Kim Kardashian nuk heq dorë nga ëndrra për t’u bërë avokate, zbulon kur do të provojë sërish provimin e licencimit

Kim Kardashian vazhdon të jetë e vendosur për të realizuar ëndrrën e saj për t’u bërë avokate, pavarësisht se nuk arriti të kalonte provimin e licencimit në Kaliforni. Ylli televiziv dhe sipërmarrësja ka bërë të ditur se nuk ka ndërmend të heqë dorë nga ky synim, por do të presë momentin e duhur për t’u përgatitur dhe për të provuar sërish. Në një intervistë për revistën People, gjatë premierës së sezonit të dytë të serialit “All’s Fair” në New York, Kardashian tregoi se provimet e drejtësisë vazhdojnë të jenë pjesë e mendimeve të saj, megjithëse angazhimet e shumta profesionale dhe familjare nuk i lënë shumë kohë për studime.

 “Unë mendoj vazhdimisht për provimet e drejtësisë”, u shpreh ajo.

Megjithatë, 46-vjeçarja theksoi se nuk dëshiron të nxitojë dhe do të presë derisa të ketë kohën e nevojshme për t’u përqendruar plotësisht te përgatitja.

“Do ta marr kohën time dhe do të pres derisa të vijë momenti i duhur, kur të kem pak kohë të lirë për t’u përkushtuar”, deklaroi Kardashian.

Interesi i saj për drejtësinë nisi të bëhej publik në vitin 2019, kur ajo tregoi se dëshironte të ndiqte rrugën e babait të saj, avokatit të njohur Robert Kardashian. Paralelisht me studimet, Kim u angazhua edhe në reformën e sistemit të drejtësisë penale, duke ndihmuar në përpjekjet për lirimin ose uljen e dënimeve të disa të burgosurve. Ajo përfundoi një program katërvjeçar të formimit ligjor përmes praktikës në një firmë avokatie dhe në korrik iu nënshtrua provimit për licencimin si avokate në Kaliforni. Në nëntor bëri të ditur se nuk kishte arritur ta kalonte.

Megjithatë, dështimi nuk e dekurajoi. Në një reagim të mëparshëm në Instagram, ajo kishte shkruar: “U afrova shumë për ta kaluar provimin dhe kjo më dha edhe më shumë motivim”. Mbështetja për të nuk mungon as nga kolegët e saj. Aktorja Sarah Paulson, me të cilën interpreton në “All’s Fair”, shprehu besimin se Kim ka potencialin për t’u bërë një avokate shumë e mirë.

“Do të jetë një avokate e shkëlqyer. Jam e sigurt”, u shpreh Paulson.

Dëshira për të ndjekur këtë profesion lidhet edhe me trashëgiminë e babait të saj, Robert Kardashian, i cili ishte një avokat i njohur dhe ndërroi jetë në vitin 2003. Në vitin 2021, Kim arriti të kalonte provimin paraprak të drejtësisë, të njohur si “baby bar”, në përpjekjen e saj të katërt.

Në atë kohë, ajo e cilësoi arritjen si një fitore personale, duke theksuar se nuk kishte qenë aspak e lehtë.

Kardashian ka treguar gjithashtu se në të ardhmen dëshiron t’i kushtohet plotësisht profesionit të avokates, duke lënë pas angazhimet në televizion dhe reality show.

“ Ndoshta pas dhjetë vitesh do të ndaloj së qeni Kim K. dhe do të bëhem një avokate që flet në sallën e gjyqit. Kjo është ajo që dua vërtet”, ishte shprehur ajo në emisionin “The Graham Norton Show”.