“Mos ma përmend familjen!”/ Përplasja mes Akilit dhe Adrianit në BBVK merr tone të ashpra

Debatet mes banorëve të Big Brother VIP Kosova 5 vijojnë të prodhojnë momente të tensionuara. Këtë herë në qendër të një përplasjeje të fortë u gjendën Akili dhe Adriani, të cilët shkëmbyen replika të ashpra dhe akuza të ndërsjella. Gjithçka nisi kur Adriani kundërshtoi sjelljen e Akilit ndaj Arlindës, duke e akuzuar se po ironizonte traumën e saj. Në kulmin e debatit, ai iu drejtua banorit me një koment ofendues: “Ti je i pafytyrë”.

Përgjigjja e Akilit nuk vonoi. Ai zgjodhi t’i kundërpërgjigjej me një deklaratë ironike: “Ndoshta jam i vogël, por burrërinë e kam të madhe”. Nga ky moment, diskutimi mori një drejtim tjetër, me të dy banorët që nisën të thumbonin njëri-tjetrin edhe për gjatësinë fizike. Kur Adriani e cilësoi sërish të vogël, Akili ia ktheu: “Unë jam aq i madh, sa gjatësia jote më duket shumë e vogël”.

Përplasja u shoqërua edhe me komente rreth sjelljes së tyre në shtëpi. Adriani e akuzoi Akilin se po krijonte qëllimisht situata për të marrë vëmendjen e publikut dhe për të qenë protagonist gjatë spektaklit Prime. Ai përmendi gjithashtu një deklaratë të mëparshme të Akilit, i cili kishte thënë se kishte vetëm dy shokë, duke vënë në dyshim sinqeritetin e tij. Megjithatë, momenti më delikat i debatit erdhi kur biseda preku familjen e Akilit. Ky i fundit ndryshoi menjëherë tonin dhe i kërkoi Adrianit të mos e përfshinte familjen në konfliktet mes tyre.

“Bëj kujdes me familje! Unë një mijë vjet me i bo, kurrë nuk ta prek. Ti e preke, kurrë më mos e bëj”, deklaroi ai i revoltuar.

Adriani vijoi diskutimin duke përmendur edhe faktin se jetonte jashtë vendit, por kjo shkaktoi një tjetër reagim të fortë nga Akili, i cili sqaroi se nëna e tij jeton në Shqipëri.

“Nëna ime rri në Shqipëri, o shok! Çka më intereson ku rri ti? Herën tjetër bëj kujdes me fjalët, kaq! A more vesh?”, iu drejtua ai.

Nga ana tjetër, Adriani u përpoq të sqaronte se nuk kishte pasur dijeni për këtë detaj dhe se, sipas tij, nuk kishte synuar të fyente apo të përfshinte familjen e Akilit në debat.

Përplasja mes dy banorëve shton edhe më shumë tensionet brenda shtëpisë, ndërsa mbetet për t’u parë nëse raporti mes tyre do të përmirësohet në ditët në vijim.