Kriza politike në Paraguai/ Santiago Pena pasi u shkarkua nga posti i presidentit, vendoset në "arrest shtëpie"

PARAGUAI- Presidenti i Paraguait, Santiago Peña, është shkarkuar nga detyra dhe është vendosur në arrest shtëpiak pas falimentimit të një banke dixhitale me lidhje me interesat e tij private të biznesit. Peña u arrestua të premten, pak minuta pasi ligjvënësit, përfshirë edhe nga partia e tij, votuan unanimisht për ta shkarkuar atë nga detyra për shkak të një krize në zgjerim të shkaktuar nga kolapsi i Ueno Bank në fillim të kësaj jave.

Pena kishte ofruar dorëheqjen një ditë më parë, por senatorët vendosën të mos e pranonin atë. Në vend të kësaj, ata votuan për shkarkimin e tij përmes procedurës së fajësimit, duke e akuzuar për shkelje të detyrës. Ky vendim bëri që ai të humbiste imunitetin që zakonisht gëzojnë ish-presidentët.

Presidenti i shkarkuar, i cili deri vitin e kaluar zotëronte aksione në kompaninë që kishte në pronësi bankën, ka mohuar çdo shkelje apo përfshirje të paligjshme. Kolapsi i Ueno Bank ka shkaktuar pasoja të rënda për qytetarët. Sipas raportimeve, rreth tre milionë depozitues kanë mbetur pa mundësi për të tërhequr kursimet dhe pensionet e tyre, duke nxitur protesta të shumta në vend, veçanërisht në kryeqytetin Asunción. 

Akuzat që çuan në shkarkimin e Penas përfshijnë konflikt interesi, ndërhyrje në mbikëqyrjen rregullatore, devijim të fondeve të pensioneve dhe përfshirje në një përpjekje për të fshehur përgjegjësitë institucionale, ku pretendohet se është përfshirë edhe Banka Qendrore. Ndërkohë, prokurorja Silvia Margarita Gonzalez Vester bëri të ditur se Pena pritet të merret në pyetje të shtunën lidhur me akuzat për shpërdorim të besimit, ushtrim të ndikimit të paligjshëm dhe përvetësim të fondeve.