Zhdukja e përkthyeses kineze me pasaportë shqiptare/ Kasaforta me 100 mijë euro dhe hetimet në Shqipëri

Të dhëna të reja janë zbardhur lidhur me zhdukjen e 50-vjeçares kineze, përkthyeses Ju Ting, gjurmët e së cilës humbën më 20 maj 2026 në Artemida të Atikës, në Greqi. Emisioni investigativ grek “Dritë në Tunel” ka publikuar detaje të reja që mund të hedhin dritë mbi misterin e zhdukjes së saj. 

Një pasaportë me fotografinë e saj, por me një emër tjetër, një kasafortë bankare ku dyshohet se ndodheshin 100 mijë euro cash, si dhe dëshmi për aktivitetet e saj profesionale në Shqipëri, shtojnë elementë të rinj në këtë çështje.

 Gati gjashtë muaj pas kontaktit të fundit të konfirmuar me të, fati i 50-vjeçares mbetet ende i panjohur. Bashkëshorti i saj, Vasilis Karavasilis, shprehet se është i bindur që gruaja e tij nuk jeton më.

Pasaporta me fotografinë e saj dhe emrin “Li Fang”

Në nisje të emisionit, një burim anonim, i cili kërkoi të mos identifikohej, dërgoi fotografinë e një dokumenti udhëtimi që dyshohet se është pasaportë e falsifikuar. Në dokument shfaqet fotografia e Ju Ting, por të dhënat e identitetit i përkasin një emri tjetër: “Li Fang”.

Data e lindjes dhe disa të dhëna të tjera personale duket se përputhen me ato të gruas së zhdukur. Një detaj veçanërisht i rëndësishëm është se, sipas informacioneve të publikuara në emision, dokumenti dyshohet se është lëshuar rreth një muaj pas zhdukjes së saj.

Siç u bë e ditur në emisionin, më pas u kryen verifikime bazuar në të dhënat e disponueshme në bazat e të dhënave greke dhe në vendet e zonës Shengen. Sipas rezultateve të paraqitura në emision, numri i pasaportës nuk rezulton i regjistruar në emër të Li Fang dhe as në emër të ndonjë personi tjetër në sistemet përkatëse.Gji thashtu, nuk rezultoi asnjë hyrje apo dalje e regjistruar nga Greqia me këtë emër ose me numrin e dokumentit në fjalë.

Origjina e fotografisë, identiteti i personit që e dërgoi atë dhe arsyeja se përse ky material iu përcoll pikërisht tani emisionit mbeten ende të paqarta.

Kasaforta bankare me 100 mijë euro

Një tjetër element i rëndësishëm i publikuar lidhet me ekzistencën e një kasaforte bankare në emër të Ju Ting, ku, sipas bashkëshortit të saj, janë gjetur 100 mijë euro në para të gatshme. 

Vasilis Karavasilis deklaroi se ishte informuar për këtë nga autoritetet që po hetojnë zhdukjen e bashkëshortes së tij. Ai pretendoi se deri në atë moment nuk kishte pasur dijeni as për ekzistencën e kasafortës bankare dhe as për origjinën e parave.

Siç shpjegoi, gjatë zhvillimit të hetimeve po zbulon se bashkëshortja e tij kishte aspekte të jetës dhe aktivitete për të cilat ai nuk ishte vënë në dijeni.

Në emision u përcoll gjithashtu informacion nga një dëshmitar, i cili pretendohet se ka akses në të dhëna konfidenciale. Sipas tij, në kasafortë ndodhej edhe një tjetër element me rëndësi të veçantë për çështjen. Megjithatë, nuk u bë e ditur se për çfarë bëhej fjalë dhe çfarë roli mund të ketë në hetim.

Pasaporta e gjetur e copëtuar në Galatsi

Dita e fundit kur Ju Ting është parë me siguri ishte e mërkura, 20 maj. Në orën 09:55 të mëngjesit, një kamerë sigurie e regjistroi teksa largohej nga banesa e saj në Lutsa. Ajo ishte e veshur me rroba të bardha dhe mbante një çantë të vogël.

Rreth një orë më vonë, në orën 11:10, ajo komunikoi përmes aplikacionit WeChat me bashkëshortin, të cilit i dërgoi disa dokumente që kishte marrë nga bashkia. Që nga ai moment nuk ka pasur më asnjë komunikim të konfirmuar me të.

Më 7 shtator, gati katër muaj pas zhdukjes, pasaporta e saj u gjet në parkun e Galatsit, e dëmtuar dhe e shpërndarë në disa copa. Pjesa e parë e dokumentit u zbulua nga një burrë që po shëtiste në zonë me qenin e tij.

Vasilis Karavasilis u rikthye në vendin e ngjarjes së bashku me ekipin e emisionit, duke treguar zonën pranë hidrantëve të zjarrfikësve, ku ishin gjetur mbetjet e pasaportës. Ai theksoi se bashkëshortja e tij nuk kishte asnjë arsye të dukshme për të vizituar atë park.

ADN-ja dhe mënyra e shkatërrimit të dokumentit

Sipas bashkëshortit, analizat laboratorike të copave të pasaportës kanë treguar praninë e materialit gjenetik të Ju Ting. “Nuk e di nëse është gjetur edhe material gjenetik i ndonjë personi tjetër dhe nëse ka mundësi të identifikohet”, deklaroi ai, duke përshkruar informacionin që, sipas tij, kishte marrë nga laboratorët kriminalistikë.

Ai nuk përjashtoi mundësinë që copat e dokumentit të jenë transportuar në park së bashku me mbetje të tjera të riciklueshme.

Dyshime ngre edhe mënyra se si është shkatërruar pasaporta, pasi duket se është përdorur një grirëse dokumentesh.

Bashkëshorti vuri në pikëpyetje arsyen përse dikush që dëshironte të zhdukte dokumentin e udhëtimit kishte zgjedhur këtë metodë dhe jo djegien e tij.

Megjithatë, ai nuk beson se vetë Ju Ting mund ta ketë organizuar zhdukjen e saj.

Telefoni që kaloi nga një person te tjetri në sheshin Attikis

Një tjetër provë e rëndësishme është telefoni celular i 50-vjeçares, i cili u gjet më 22 korrik në sheshin Attikis, dy muaj pas zhdukjes së saj. Sipas Vasilis Karavasilis, një burrë me origjinë bullgare dyshohet se e kishte gjetur pajisjen dhe më pas ia kishte shitur një shtetasi shqiptar. Telefoni ishte i ndezur dhe kishte bateri, por mbetej i kyçur.

Gjatë emisionit u identifikua edhe burri me origjinë shqiptare, i cili dyshohet se kishte çaktivizuar pajisjen dhe kishte kryer rikthimin e cilësimeve të fabrikës.

Ai pretendoi se nuk kishte arritur asnjëherë të hynte në të dhënat që përmbante telefoni.

Sipas bashkëshortit të së zhdukurës, të dy personat janë thirrur disa herë nga autoritetet për të dhënë shpjegime lidhur me këtë çështje.

Kontaktet në Shqipëri dhe projekti për një fabrikë të ambalazhimit të ujit

Hetimet u shtrinë edhe në Shqipëri, ku Ju Ting kishte krijuar kontakte profesionale përpara se të zhdukej.

Në bashkëpunim me gazetaren Doriela Çule, nga televizioni Top Channel, ekipi investigativ vizitoi Kuçovën, në Shqipërinë e mesme.

Atje u takua me një biznesmen që zotëron një hotel dhe që ishte njohur me Ju Ting përmes kushërirës së tij, e cila ushtron aktivitetin si agjente imobiliare në Greqi.

Të dyja palët kishin diskutuar për disa bashkëpunime të mundshme biznesi, mes tyre edhe një investim në një fabrikë për ambalazhimin e ujit.

Rreth një muaj përpara zhdukjes, 50-vjeçarja kishte vizituar hotelin së bashku me vjehrrën e saj dhe një investitor kinez, për të shqyrtuar mundësitë e realizimit të këtij projekti.

Pronari i hotelit tregoi gjithashtu se Ju Ting i kishte prezantuar dy bashkëkombës të saj, një burrë dhe një grua, të cilët pritej të punësoheshin si kuzhinierë në hotel. Megjithatë, asnjëri prej tyre nuk u paraqit për të filluar punë.

Duke folur për kontaktet që kishte pasur me autoritetet shqiptare lidhur me këtë çështje, biznesmeni deklaroi:

“Gjithçka ia kam thënë avokatit. Ia kam thënë edhe policisë. Edhe shërbimeve sekrete ua kam thënë. Edhe ata erdhën”.

Përmendja e shërbimeve sekrete shqiptare përbën një tjetër element të dëshmisë së tij, megjithëse nuk janë bërë të ditura arsyet për të cilat, sipas tij, ato kishin shfaqur interes për çështjen.

Udhëtimi në Kinë dhe leja e qëndrimit në Shqipëri

Biznesmeni kishte përshkruar marrëdhënien miqësore që kishte krijuar me Ju Ting. Siç tha ai, kishin udhëtuar së bashku për dhjetë ditë në Kinë, ku kishin shqyrtuar edhe mundësi të ndryshme bashkëpunimi tregtar.

Ai u ndal veçanërisht te dëshira e saj për të siguruar një leje qëndrimi në Shqipëri, pavarësisht se zotëronte një dokument të tillë edhe në Greqi.

“E kisha pyetur përse i duhej leja shqiptare e qëndrimit, kur kishte atë greke, dhe ajo më ishte përgjigjur: ‘Dua t’i kem të dyja’”, tregoi ai.

Biznesmeni këmbënguli se nuk e dinte se çfarë i kishte ndodhur 50-vjeçares dhe se marrëdhënia e tyre nuk ishte aq e afërt sa të kishte dijeni për të gjitha aktivitetet e saj. Nga ana tjetër, bashkëshortja e tij shprehu dëshirën që gruaja e zhdukur të gjendet e gjallë. Çfarë zbuluan hetimet në Bogovë dhe Korçë

Investigimi gazetaresk vijoi në Bogovë të Shqipërisë së mesme, ku u verifikua informacioni se një biznesmene kineze kishte planifikuar të investonte në një fabrikë për ambalazhimin e ujit.

Një punonjës i zonës konfirmoi se kishte pasur diskutime për një investim të tillë. “Ka katër deri në pesë muaj që diskutohet për këtë investim”, deklaroi ai.

Kur iu tregua fotografia e Ju Ting, punonjësi sqaroi se nuk e kishte njohur personalisht dhe për këtë arsye nuk mund të konfirmonte nëse bëhej fjalë për personin që lidhej me projektin e investimit.

Ekipi investigativ udhëtoi gjithashtu drejt Korçës, duke ndjekur informacionet sipas të cilave e zhdukura mund të kishte pasur kontakte me një kompani të paketimit të mollëve në muajin gusht, pra disa muaj pas zhdukjes së saj.

Pronari i kompanisë refuzoi të takohej me gazetarët, duke pretenduar se nuk e njihte Ju Ting dhe se nuk kishte të punësuar persona me origjinë kineze. Këto informacione nuk arritën të konfirmoheshin. 

Pse bashkëshorti përjashton mundësinë që ajo të ndodhet në Shqipëri

Pavarësisht kontakteve profesionale që Ju Ting duket se kishte krijuar në vendin fqinj, Vasilis Karavasilis nuk beson se bashkëshortja e tij është larguar vullnetarisht nga Greqia për t'u vendosur në Shqipëri. Siç shpjegoi ai, leja e saj e punës ndodhej brenda çantës që kishte me vete ditën e zhdukjes, e cila ende nuk është gjetur.

Gjithashtu, ai vuri në dukje se për të kaluar kufirin dhe për të hyrë në Shqipëri, bashkëshortes së tij do t'i duhej pasaporta, e cila u gjet më vonë e shkatërruar në parkun e Galatsit. Për këtë arsye, ai e konsideron të pabesueshëm skenarin e largimit vullnetar të saj drejt Shqipërisë.

Shfaqja e pasaportës së dyshuar si e falsifikuar, origjina e panjohur e parave që pretendohet se u gjetën në kasafortën bankare, pasaporta e vërtetë e shkatërruar dhe itinerari i telefonit celular përbëjnë tashmë disa pista të veçanta në një çështje që vazhdon të mbetet e mbuluar nga misteri. Megjithatë, pyetja më e rëndësishme ende nuk ka marrë përgjigje: çfarë ndodhi me Ju Ting pas orës 11:10 të paradites së 20 majit? /PiranjatNews/