“Ushtarët” e rinj të Klodian Lekocajt dalin para gjykatës: Sulmova me molotov dyqanin për 1 mijë euro 

Pesë personat e arrestuar, të moshës 17 deri në 20 vjeç, të akuzuar për përfshirje në një rrjet që kryente shpërthime dhe zhvatje ndaj dyqaneve në qendër të Athinës, janë lënë në paraburgim pas dëshmive të tyre para hetuesisë.

Në veçanti, gjatë marrjes në pyetje nga hetuesi për të miturit, 17-vjeçari i pandehur mohoi përfshirjen në një organizatë kriminale, si dhe hodhi poshtë pretendimet se kishte përgatitur kokteje Molotov dhe kishte kryer zjarrvënie të qëllimshme.

Ai është një nga personat që shfaqen në pamjet e kamerave të sigurisë duke hedhur kokteje Molotov në një dyqan. Në dëshminë e tij, ai pretendoi se kishte probleme financiare dhe se për kryerjen e këtij veprimi i ishin premtuar 1 000 euro.

Edhe një tjetër i pandehur, 19 vjeç, mohoi akuzat. Ai pretendoi se një mik i tij, gjithashtu i pandehur në këtë çështje, i kishte kërkuar ta shoqëronte deri në një kafene, por vetëm pasi mbërritën në vendngjarje kishte kuptuar arsyen e vizitës. Sipas pretendimeve të tij, ai ndodhej në distancë nga vendi ku ndodhi shpërthimi dhe, sapo dëgjoi zhurmën, u largua me vrap nga frika.

Në dosjen e çështjes përfshihen edhe katër persona të tjerë, të cilët ndodhen në burg, mes tyre një 49-vjeçar i dënuar për krime të rënda. Sipas akuzës, ai dyshohet se drejtonte aktivitetin e grupit nga qelia e tij dhe organizonte sulmet.

Ndaj personave të përfshirë janë ngritur akuza, sipas rastit, për 13 vepra penale dhe tri kundërvajtje. Hetimet e zhvilluara nga FBI-ja greke kanë ngritur dyshime se organizata drejtohej nga shqiptari Klodian Lekocaj, i njohur edhe si Klod Cara, pavarësisht se ai ndodhet pas hekurave në burgun e Trikallas. /PiranjatNews/