Lëviznin me taksi të armatosur, arrestohen dy të rinj! Kundërshtuan dhunshëm efektivët

Një 30-vjeçar është arrestuar në Tiranë pasi lëvizte me taksi duke mbajtur me vete një armë zjarri pa leje. Në pranga ka përfunduar edhe pasagjeri tjetër që udhëtonte në të njëjtin automjet.

Në kuadër të operacionit “Taksimetri” u vunë në pranga Petrit Shima 30 vjeç dhe Redion Hymeri, 25 vjeç të dy banues në Thumanë.

Sipas Policisë së Shtetit, të dy të arrestuarit kanë precedentë penalë. Gjatë shoqërimit dhe kryerjes së veprimeve procedurale, ata kanë kundërshtuar me dhunë efektivët e policisë, duke i goditur, ndërsa më pas kanë dëmtuar edhe ambientet e dhomës së shoqërimit në komisariat.

“Si rezultat i administrimit të shpejtë të një informacioni të siguruar gjatë punës operative, për një shtetas që kishte lëvizur me armë zjarri me vete, nga Kruja drejt Tiranës, shërbimet e Policisë të Komisariatit të Policisë Nr. 2 finalizuan operacionin e koduar “Taksimetri”, në kuadër të të cilit u arrestuan në flagrancë shtetasit Petrit Shima 30 vjeç dhe Redion Hymeri., 25 vjeç, të dy banues në fshatin Thumanë.

Taksia në të cilën ishte pasagjer shtetasi i dyshuar, Petrit Shima  u ndalua në rrugën “Sami Frashëri”.

Gjatë kontrollit fizik, 30-vjeçarit iu gjet 1 armë zjarri (pistoletë) me municion, të cilën e posedonte pa leje.

Me të njëjtin mjet lëvizte edhe 25-vjeçari, i cili nuk kishte kallëzuar krimin.

Të dy shtetasit kanë goditur punonjësit e Policisë, gjatë kryerjes së veprimeve procedurale, dhe më pas, kanë dëmtuar ambientet e dhomës së shoqërimit.”- njofton policia.

Materialet procedurale iu referuan Prokurorisë, për veprime të metejshme.