Nga Anila Sulstarova
Unë, Edi Rama, kërkoj falje publike. Kërkoj falje publike që pata më shumë nevojë ta shihja vendin ...
AKTUALITET
Ndotja në ish-Metalurgjikun e Elbasanit/ Prokuroria nis hetimet ndaj AlbChrome, alarm për mbetje kancerogjene
PiranjatPërditësimi i fundit 31 October 2026, 08:43
Prokuroria e Elbasanit ka nisur një hetim penal ndaj kompanisë “AlbChrome”, pas konstatimeve të Agjencisë Kombëtare të Mjedisit (AKM) për depozitimin e mbetjeve industriale në ambient të hapur, në zonën e ish-Kombinatit Metalurgjik. Sipas raportit të AKM-së, mbetjet janë krijuar gjatë proceseve industriale dhe vijnë nga pluhurat e kapëseve.
Ato dyshohet se janë grumbulluar dhe depozituar prej vitesh pa respektuar standardet e sigurisë dhe administrimit të mbetjeve, duke krijuar shqetësime për ndotjen e mjedisit dhe rrezikun e mundshëm për shëndetin e banorëve. Agjencia Kombëtare e Mjedisit i ka klasifikuar këto mbetje si shumë të rrezikshme, për shkak të pranisë së përbërësve potencialisht kancerogjenë.
Konstatimet kanë nxitur ndërhyrjen e Prokurorisë së Elbasanit, e cila ka vendosur nisjen e procedimit penal për të zbardhur rrethanat e rastit dhe për të identifikuar përgjegjësitë e mundshme. Me urdhër të drejtuesit të Prokurorisë, Kreshnik Ajazi, është ngritur një grup i posaçëm hetimor, i përbërë nga tre prokurorë dhe dy hetues.
Grupi do të administrojë dokumentacionin, do të mbledhë provat dhe do të kryejë veprimet hetimore për të dokumentuar shkeljet e mundshme. Ndër veprimet e para është urdhëruar këqyrja e vendit të ngjarjes, për të evidentuar gjendjen në terren, llojin dhe sasinë e mbetjeve të depozituara, si dhe kushtet në të cilat ato janë mbajtur.
Hetuesit do të përpiqen të përcaktojnë periudhën gjatë së cilës është kryer depozitimi, mënyrën e administrimit të mbetjeve dhe personat apo subjektet që mund të mbajnë përgjegjësi. Një tjetër aspekt i rëndësishëm i hetimit do të jetë vlerësimi i dëmeve të mundshme mjedisore dhe ndikimit që ndotja mund të ketë pasur në shëndetin e komunitetit.
Rasti rikthen në vëmendje problematikën e ndotjes industriale në Elbasan, veçanërisht në zonën e ish-Kombinatit Metalurgjik, ku administrimi i mbetjeve dhe siguria mjedisore kanë qenë prej vitesh objekt shqetësimi. Tashmë pritet që hetimet e Prokurorisë të përcaktojnë rrethanat e plota të depozitimit të mbetjeve dhe përgjegjësitë konkrete të personave apo subjekteve të përfshira.
