Në Paris flet për paqen, në Shqipëri shtyp protestuesit. Rama tenton të minimizojë revoltën kundër tij

Kryeministri Edi Rama zgjodhi Forumin e Paqes në Paris për të folur për protestat që prej muajsh kanë tronditur Shqipërinë. Por, ndërsa mijëra qytetarë kanë dalë në rrugë kundër qeverisë së tij, Rama u përpoq ta paraqiste valën e kundërshtimit si një lëvizje që tashmë është reduktuar në një grup të vogël protestuesish të dhunshëm.

Nga Musée de l’Homme, ku po merr pjesë në diskutimet për zgjerimin e Bashkimit Europian dhe të ardhmen e brezit të ri, kryeministri pranoi se protestat e fillimqershorit kishin mbledhur një numër të madh qytetarësh. Por ai bëri një ndarje të prerë mes atyre demonstratave dhe protestave që vijuan më pas.

“Në manifestimet e fillimqershorit pati një numër mjaft të madh njerëzish që vinin nga të gjitha fushat e jetës dhe shprehnin shqetësime, të cilat erdhën si rrjedhojë e projektit të famshëm që lidhet me Jared Kushner”, deklaroi Rama.

Më pas, kryeministri e përshkroi vazhdimin e protestave në një mënyrë krejt tjetër.

“Nga kjo pastaj mbeti një numër shumë i vogël protestuesish që më vonë përshkallëzuan në dhunë, që nuk është e pranueshme dhe s'ka të bëjë më me protestën e fillimit”, u shpreh ai.  

Deklarata e kryeministrit bie në kontrast me përmasat që ka marrë lëvizja protestuese gjatë muajve të fundit.

Protestat nisën në fund të majit kundër projektit turistik të lidhur me Jared Kushner, dhëndrin e presidentit amerikan Donald Trump, në zonën e Zvërnecit. Kundërshtimi ndaj ndërtimeve pranë një zone të ndjeshme mjedisore u shndërrua gradualisht në një lëvizje më të gjerë kundër qeverisë.

Më 10 qershor, mijëra qytetarë mbushën bulevardin përpara Kryeministrisë. Protestuesit kërkonin anulimin e projektit dhe denonconin mungesën e transparencës, ndërsa pankartat me mesazhin “Shqipëria nuk është në shitje” u kthyen në simbol të revoltës.

Demonstratat nuk u ndalën aty. Në javët dhe muajt pasues, kërkesave për mbrojtjen e mjedisit iu shtuan pakënaqësitë për korrupsionin, shëndetësinë, arsimin, varfërinë dhe mungesën e perspektivës për të rinjtë.

Thirrja për dorëheqjen e Ramës u bë një nga kërkesat kryesore të protestuesve.

Megjithatë, në Paris, kryeministri zgjodhi të vinte theksin te dhuna e një pjese të demonstruesve, duke e lënë në plan të dytë vazhdimësinë e protestave dhe kërkesat që i kanë nxjerrë qytetarët në rrugë.

Kontrasti bëhet edhe më i fortë kur deklaratat e Ramës vendosen përballë mënyrës se si janë zhvilluar përplasjet mes protestuesve dhe policisë.

Gjatë demonstratave të muajve të fundit janë dokumentuar ndërhyrje të forcave të rendit me ujëhedhës, gaz lotsjellës dhe shkopinj gome.

Në fillim të qershorit, policia përdori ujëhedhës për të shpërndarë protestuesit që kundërshtonin projektin në Zvërnec. Në zonën e projektit u dokumentuan gjithashtu përplasje me forcat e sigurisë dhe protestues të lënduar.

Situata u përshkallëzua gjatë tetorit, kur protestat kundër qeverisë u shoqëruan me përplasje të dhunshme. Një pjesë e demonstruesve hodhën gurë dhe bomba molotov ndaj policisë, ndërsa forcat e rendit u përgjigjën me gaz lotsjellës, ujëhedhës dhe ndërhyrje fizike.

Bilanci përfshiu qindra të arrestuar dhe të plagosur, mes tyre edhe efektivë policie. Shtatë policë u pezulluan në kuadër të hetimeve për dyshime mbi përdorimin e tepruar të forcës.

Pra, ndërsa Rama denoncon dhunën e protestuesve nga një forum ndërkombëtar kushtuar paqes, brenda vendit mbeten të hapura edhe pyetjet për proporcionalitetin e ndërhyrjeve të policisë dhe trajtimin e qytetarëve që ushtrojnë të drejtën e protestës.