Një anije luksoze turistike në një udhëtim njëvjeçar rreth botës tha se pezulloi operacionet për shkak të kostove...
POLITIKE
Paketa Fiskale 2027, Xhixho: Maxhoranca rrëzoi tri herë propozimin për uljen e TVSH-së për ushqimet
PiranjatPërditësimi i fundit 28 October 2026, 12:02
Deputetja e Partisë së Lirisë, Erisa Xhixho, ka akuzuar maxhorancën se ka rrëzuar në tri raste propozimin për uljen e TVSH-së për ushqimet e shportës nga 20% në 5%.
Në një deklaratë live, Xhixho renditi nismat e depozituara nga Partia e Lirisë në vitet 2017, 2022 dhe 2025, të cilat, sipas saj, nuk u morën parasysh nga maxhoranca.
Ajo kujtoi se propozimi i parë u depozitua më 15 nëntor 2017, me numër protokolli 2870. Nisma u paraqit sërish më 22 nëntor 2022, në një periudhë kur, sipas Xhixhos, rritja e çmimeve dhe pasojat e pandemisë e bënin të domosdoshme lehtësimin e kostos së jetesës për qytetarët.
Propozimi i tretë u depozitua më 14 tetor 2025, me numër protokolli 2903, me iniciativën e presidentit të Partisë së Lirisë, Ilir Meta, bëri të ditur Xhixho.
Deputetja tha se edhe kjo nismë u rrëzua nga maxhoranca, e cila, sipas saj, e kishte cilësuar propozimin si të pamenduar gjatë diskutimeve në komisionet parlamentare.
Xhixho kritikoi qeverinë për moszbatimin e premtimit për uljen e TVSH-së për ushqimet, duke theksuar se kjo masë ishte propozuar nga Partia e Lirisë si një mënyrë për të lehtësuar barrën ekonomike të familjeve shqiptare.
Në përfundim, ajo ngriti pikëpyetje mbi arsyet e rrëzimit të nismave në të tria rastet, duke rikujtuar se ulja e TVSH-së për ushqimet ishte premtuar edhe nga maxhoranca në vitin 2013.
Erisa Xhixho: Me forcën e kartonit, sipas urdhrave të Edi Ramës, dhe kurrë sipas interesave të qytetarëve shqiptarë. Në fund të vitit 2017, dhe ja ku është propozimi i Partisë së Lirisë i depozituar nga kryetari i grupit, zoti Vasili. Në 15.11.2017 me numër protokolli 2870, i cili propozonte që në 2017-ën, uljen e TVSH-së për ushqimet e shportës nga 20% në 5%. Kjo iniciativë u refuzua dhe u rrëzua me forcën e kartonit dhe nuk u mor fare parasysh.
Vazhdojmë në vitin 2022. Kemi sërish Partinë e Lirisë, e cila depoziton përsëri propozimin për uljen e TVSH-së për shportën, dhe pikërisht në datën 22.11.2022 me numër protokolli 2926. Dhe kemi parasysh luftën në Ukrainë, rritjen e çmimeve, një situatë pas pandemisë dhe kjo masë ishte një kërkesë e qytetarëve që ne e sollëm në kuvend dhe një masë e domosdoshme lehtësuese për koston e lartë të jetesës. Përsëri kjo maxhorancë, kjo qeveri, e rrëzoi me forcën e kartonit dhe nuk e mori fare parasysh. Vazhdojmë në 2025-ën, ku me iniciativën e presidentit Meta ne depozituam si grup parlamentar i Partisë së Lirisë, sërish iniciativën për uljen e TVSH-së për ushqimet e shportës nga 20% në 5%. Në datë 14.10.2025 me numër protokolli 2903. Dhe përsëri, kjo iniciativë u hodh poshtë nga kjo maxhorancë.
Më lejoni t'jua tregoj edhe njëherë, pra e vitit 2025. Në të gjithë debatet që ne kemi pasur nëpër komisionet parlamentare, në Komisionin e Ligjeve, të Ekonomisë e kudo, kjo maxhorancë tha që kjo iniciativë ishte e pamenduar, edhe pse ne i rikthyem premtimin e tyre të 2013-ës dhe faktin që TVSH-ja jonë e ushqimeve ishte më e larta në rajon. Tani të gjithë qytetarët shqiptarë mund të pyesin: pse u rrëzua kjo iniciativë e Partisë së Lirisë në 2017-ën? Përsëri në 2022-shin? Dhe së fundmi në 2025-ën? Dhe ulja e TVSH-së për ushqimet, e cila është premtuar nga kjo maxhorancë në 2013-ën, u refuzua totalisht.
