PD Tropojë denoncon gjendjen e Urës së Merturit: Rrezik për jetën e qytetarëve

Partia Demokratike në Tropojë denoncon gjendjen e rëndë të Urës së Merturit, duke e cilësuar atë një rrezik serioz për jetën dhe sigurinë e qytetarëve.

Përmes një reagimi publik, PD Tropojë ka publikuar pamje nga ura e dëmtuar, duke akuzuar Bashkinë Tropojë për neglizhencë dhe mungesë përgjegjësie institucionale.

Demokratët shprehen se, ndërsa drejtuesit e bashkisë flasin për punë dhe investime, realiteti në terren dëshmon, sipas tyre, braktisjen e problematikave jetike të banorëve.

Në reagimin e saj, PD ngre shqetësimin se nuk duhet pritur një aksident apo tragjedi që institucionet të ndërhyjnë për zgjidhjen e situatës.

Partia Demokratike kërkon ndërhyrje të menjëhershme për riparimin e Urës së Merturit, garantimin e sigurisë së kalimit dhe mbajtjen e përgjegjësisë institucionale për gjendjen e krijuar.

Sipas PD-së, qytetarët e Tropojës meritojnë infrastrukturë të sigurt dhe shërbime, jo premtime dhe neglizhencë.