Deputetja e PS-së, Iris Luarasi del në mbrojtje të Klodiana Lalës dhe godet Vlora Hysenin: E papranueshme

Deputetja socialiste Iris Luarasi del publikisht në krah të gazetares Klodiana Lala dhe kritikon deklaratat e Vlora Hysenit në hyrje të GJKKO-së. Luarasi kërkon nga SPAK që të trajtojë me përparësi kallëzimin e gazetares, duke e cilësuar situatën si çështje të lirisë dhe sigurisë së medias.

Reagimi i plotë

Deklarata e ish-drejtueses së SHISH-it ndaj Klodiana Lala në hyrje të GjKKO-së është e papranueshme. Një gazetare po bënte një pyetje me interes publik. Në vend të përgjigjes mori insinuata që dëmtojnë reputacionin, integritetin profesional dhe sigurinë e saj personale.

Si zëvendëskryetare e Komisionit për të Drejtat e Njeriut dhe Median, i bëj thirrje SPAK-ut që ta trajtojë me seriozitet dhe me përparësi kallëzimin e gazetares.

I bëj thirrje gjithashtu institucioneve përgjegjëse që të garantojnë mbrojtjen e saj.
Pyetjet e gazetarëve duhet të marrin përgjigje, jo kërcënime. Mbrojtja e gazetarëve është detyrim i shtetit dhe kusht për demokracinë. Gazetarët që bëjnë pyetje nuk janë armiq. #LiriaeShtypit #PressFreedom #SafeJournalists #StopIntimidimitTëGazetarëve