Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
POLITIKE
Këlliçi i përgjigjet Ramës: Shqipëria ka ngecur në BE për shkak të Ballukut jo të opozitës
PiranjatPërditësimi i fundit 11 Prill 2026, 20:07
Deputeti i Partisë Demokratike, Belind Këlliçi, ka reaguar në rrjetet sociale lidhur me takimet publike të kryeministrit Edi Rama, ku sipas tij ka qenë e pranishme edhe ish-zv.kryeministrja Belinda Balluku.
Në një postim në rrjetet sociale, Këlliçi akuzon Edi Ramën se ka penguar procesin e integrimit europian të Shqipërisë, duke e lidhur këtë, sipas tij, me mbrojtjen politike ndaj Ballukut në Kuvend.
“Me Ballukun në krahë, për të cilën pengoi integrimin e Shqipërisë, Edi Rama… fajëson si gjithmonë opozitën”, shkruan Këlliçi, duke shtuar se qëndrimet e kryeministrit janë “gënjeshtra dhe shpifje”.
Sipas Këlliçit, mbrojtja e Ballukut në Kuvend, me 82 vota, sipas tij, është një nga arsyet që Shqipëria nuk ka arritur të mbyllë kapitujt kryesorë të negociatave me Bashkimin Europian.
Reagimi i deputetit të PD, Belind Këlliçi:
Me Ballukun në krahë, për të cilën pengoi integrimin e Shqipërisë, Edi Rama (miku i Ron Yeffetit dhe Charles McGonigal), fajëson si gjithmonë Opozitën!
Duke pasur në krah Belinda Ballukun, mbrojtja e të cilës në Kuvend me 82 kartona është arsyeja kryesore pse Shqipëria nuk po e mbyll dot kapitullin kryesor me BE, Edi Rama arriti sot në një nivel të paimagjinueshëm të gënjeshtrave e shpifjes, sikur Opozita po pengon integrimin.
Një ligësi që nuk bën më punë as tek ata që e duartrokasin, që thirren aty me urdhër partie.
Edhe më militanti, edhe patronazhisti më i verbër, e di mirë se Edi Rama zgjodhi Belinda Ballukun, përpara integrimit.
Ishte Brukseli në Tiranë që foli me gojën e McAllister, e tha qartë: ‘Imuniteti i Ballukut, është test kritik për Shqipërinë’! Edi Rama vendosi ta mbrojë Ballukun, të pengojë drejtësinë për aferat e tij, për abuzimet e tij prej miliarda eurosh dhe për këtë akt, sot procesi ka ngrirë, teksa Mali i Zi po ecën çdo ditë e më shumë.
Për ta bërë mashtrimin më të madh, shoku i Ronit u thotë militantëve të tij sikur paska folur dhe e di se çfarë ka ndodhur dhe me vendet e tjera të rajonit.
E vërteta është se vendet e rajonit që janë integruar, apo që po ecin përpara në këtë proces, i kanë plotësuar kriteret që ka kërkuar Brukseli. I vetmi që refuzoi kërkesën e tyre, që zgjodhi Belindën para ligjit, para drejtësisë, para Shqipërisë, është Edi Rama.
Dhe ai është përgjegjësi i vetëm pse procesi për ne ka ngecur.
Dhe nuk ka fare turp të mburret me zgjedhjen që ka bërë, pasi del me të pandehurën për 1.1 miliardë euro abuzim, në krah. Duke i dhënë edhe më shumë pushtet, imunitet e paprekshmëri.
Kjo është arsyeja pse për Shqipërinë ka pyetje të tjera, ka çështje të tjera, ka skepticizëm dhe shtyrje të integrimit!
