Përmes një audimesazhi presidenti i Partisë së Lirisë iu drejtua me një letër publike kryetares së Komitetit Shqiptar të Helsinkit, Znj. Erida Skëndaj.
Në audiomesazh Meta identifikon keqpërdorimin e paraburgimit si mjet persekutimi politik dhe njerëzor.
Letër publike drejtuar kryetares së Komitetit Shqiptar të Helsinkit
E nderuar Znj. Erida Skëndaj,
Kryetare e Komitetit Shqiptar të Helsinkit!
Të nderuar anëtarë të Komitetit të Helsinkit!
Jam i detyruar, për arsye se sot në mënyrë tërësisht absurde m’u pengua që këtë letër drejtuar Kryetares së Komitetit të Helsinkit të Shqipërisë, Znj. Skëndaj, t’ja përcillja me firmën time përmes shërbimeve të IEVP-së “Jordan Misja”, pranë drejtuesve të Partisë së Lirisë, që prisnin për orë të tëra përjashta.
Meqënëse, kjo u pamundësua, atëherë jam i detyruar që ta bëj publike për të gjithë.
E nderuar Znj. Erida Skëndaj!
Në radhë të parë ju falenderoj që pas 18 muajsh dërguat përfaqësuesin tuaj, Z. Zylyftar Bregu të Komitetit të Helsinkit, të më vizitonte në qelinë time, këtu te IEVP “Jordan Misja”.
Së dyti, ju falenderoj se vetëm pas konstatimit nga ana e përfaqësuesit tuaj, se në tualetin e kësaj qelie nuk kishte drita, menjëherë erdhën elektriçistët dhe i vendosën, pasi këtë punë nuk i lejonin ta bënin që nga 23 tetori 2024, kur unë u bëra banor i IEVP-së që mban një emër Heroi si Jordan Misja.
Sigurisht që kjo është një neglizhencë “e vogël”, të cilën unë se kam ngritur kurrë publikisht, pasi këto sjellje ordinere nuk më habisin e shqetësojnë, por as përfaqësuesi juaj nuk do ta besonte po ta thoja publikisht pa e parë me sytë e tij. Mistrecllëqe të tilla ka dhe shumë të tjera, që përfaqësuesi juaj mund t’jua thotë juve siç është edhe shpimi i bidonave plastikë prej 20 litrash për të më cënuar sado pak mua ushtrimet fizike në qeli, meqënëse këtu nuk ka palestër.
Ajo që më shqetësoi më shumë nga takimi me përfaqësuesin tuaj ishte se përgjegjësi i Policisë i kishte thënë se edhe unë bëj ajrosje dy herë në ditë si gjithë të tjerët.
Unë i kërkova ballafaqim përfaqësuesit tuaj me këtë përgjegjës policie, emrin e të cilit ai nuk e dinte ose nuk ma tha.
Po kështu, jam i hapur në çdo kohë, në praninë tuaj apo të përfaqësuesve të Komitetit të Helsinkit, që të ballafaqohem me këtë përgjegjës policie, që mashtron Komitetin e Helsinkit. Që nga dënimi im, pas komunikimit telefonik me gazetaren Znj. Aida Toncica në 2 korrik 2025, përmes numrit të avokatit tim Z. Kujtim Cakrani, unë bëj vetëm një herë në ditë ajrosje, ndryshe nga 500 banorët e tjerë të IEVP-së “Jordan Misja” dhe këtë e dinë dhe e shohin të gjithë këtu, përveç këtij shefit të Policisë.
Po kështu, duhet të dini se edhe sot e kësaj dite edhe pse e kam kërkuar zyrtarisht edhe përmes avokatit tim, ende nuk na është dhënë vendimi zyrtar se përse jam dënuar unë nga Komisioni Disiplinor i IEVP “Jordan Misja”, që në 2 korrik 2025.
A nuk kam të drejtë edhe unë si çdo qytetar që të njihem me bazën ligjore dhe arsyet e këtij vendim-dënimi? Po kështu, pse të më mohohet e drejta edhe mua, si çdo qytetari tjetër për t’u ankuar? Akoma më e rëndë është përgjigjja për ju, e Drejtorit të Përgjithshëm të Burgjeve, që vlerëson se çfarë duhet të them unë në media kur pyetem apo se nuk duhet të flas për çështjen penale kundër meje pasi kjo mund të shqetësojë prokurorët.
Pra, të tjerët kanë të drejtë të shpërndajnë gënjeshtra në media se gjoja kanë dalë fakte të reja nga hetimi kundër Metës, se gjoja Meta ka përdorur karta amerikane, ndërsa unë nuk paskam të drejtë t’u them të gjithë shqiptarëve se jo vetëm karta amerikane dhe europiane, por kurrë nuk kam patur mundësinë të përdor as kartë shqiptare.
Në një vend demokratik, jo vetëm prokurorët kanë të drejtë të akuzojnë apo edhe të abuzojnë për fat të keq, e kjo varet nga personaliteti i tyre, por edhe i akuzuari ka të drejtë të mbrohet publikisht dhe të distancohet nga gënjeshtrat në adresë të tij.
Nëse i pandehuri intimidon prokurorët apo dëshmitarët, të cilët në rastin tim nuk ekzistojnë, askush nuk i ndalon prokurorët të ngrejnë akuza të reja ndaj të pandehurit, përfshirë edhe rastin tim.
Për më tepër, që për shkak të funksioneve më të larta që kam mbajtur në Republikën e Shqipërisë si President i Republikës, Kryetar i Kuvendit dhe Kryeministër, por edhe si President i Partisë së Lirisë sot, kam detyrimin të jap llogari para qytetarëve shqiptarë për çdo akuzë apo trillim kundër personit tim.
Nuk mund të jetë cënim i hetimit, Znj. Kryetare, të kërkosh publikisht që të pyetet personi konkret shqiptaro-amerikan, që prokurorët nuk kanë dashur ta bëjnë deri tani, për katër vite me rradhë.
Edhe vetë gjyqtarja, Znj. Irena Gjoka, e konstatoi këtë mangësi të hetimit në dosje dhe ja la për detyrë Gjykatës të Themelit për ta zgjidhur në të ardhmen. Nuk është cënim i hetimit, Znj. Kryetare, që të kërkohet që letërporositë drejtuar SHBA për lobimet të bazohen mbi kontratën e ligjshme të LSI-së me GSIS-në, të regjistruar në SHBA dhe në Shqipëri dhe që çdo gjë të bëhet transparente sipas kësaj kontrate, si e vetmja mënyrë për të verifikuar nëse ka shkelje të ligjeve amerikane apo shqiptare dhe cili apo cila palë apo person është përgjegjës për këto shkelje nëse janë të vërteta, në SHBA apo në Shqipëri.
Keqpërdorimi i paraburgimit tim si mjet persekutimi politik dhe njerëzor, nuk ka ngjashmëri as me Rusinë e Putinit, ku kundërshtarëve u është lejuar të intervistohen edhe nga mediat ndërkombëtare në burgjet më të largëta të Siberisë.
Po kështu, është një mashtrim që ju është bërë juve se gjoja jam lejuar të takohem me Z. Tedi Blushi.
Që nga Qershori 2025, asnjë takim shtesë nuk më është lejuar dhe pranuar me Z. Tedi Blushi, madje ende vazhdon i bllokuar në mënyrë të paligjshme numri i tij i telefonit, pavarësisht nga rekomandimi i Avokatit të Popullit.
Z. Blushi apo edhe Z. Petrit Vasili apo Z. Edmond Panariti, gjatë kësaj kohe kanë ardhur në vend të familjarëve të mi, me kërkesën time, duke sakrifikuar takimet me familjarët e mi.
Kjo është në kundërshtim me të gjitha të drejtat e mia njerëzore, por edhe politike, si President i Partisë së Lirisë, të njohura këto nga Konventa Europiane për të Drejtat e Njeriut, por edhe të rekomanduara nga vetë Avokati i Popullit zyrtarisht.
Unë nuk kam kërkuar të bëj mbledhje të Partisë së Lirisë këtu, siç e le të nënkuptuar përgjigjja e ish-Drejtorit të Përgjithshëm, Z. Klevis Qosja për ju.
Por të kem mundësinë që përveç katër takimeve familjare, siç do i paraburgosur tjetër në Republikën e Shqipërisë, të kem takime shtesë me deputetët e Partisë së Lirisë apo drejtues të caktuar të saj, siç ka ndodhur para zgjedhjeve të 11 Majit 2025.
Po kështu, ju keqinformoheni kur ju thuhet se nuk ka patur kërkesa nga ne për të dhënë intervista në media kur janë me dhjetëra kërkesat e gazetarëve të njohur për të më intervistuar.
Disa prej tyre kanë marrë leje edhe nga SPAK-u, por janë bllokuar nga Drejtoria e Përgjithshme e Burgjeve, që ju ka gënjyer juve.
Ne do t’u vemë në dispozicion të gjitha kërkesat e gazetarëve dhe përgjigjet e SPAK-ut apo të Drejtorisë së Përgjithshme të Burgjeve.
Unë Znj. Kryetare, nuk kërkoj asnjë trajtim të privilegjuar, por të drejta të barabarta si gjithë të paraburgosurit e tjerë dhe po kështu garantimin e të drejtave të mia politike, ku kryesorja është heqja e pengesave të paligjshme të komunikimit telefonik me Z. Tedi Blushi, si Sekretar i Përgjithshëm dhe Kryetar i Grupit Parlamentar të Partisë së Lirisë dhe drejtues të tjerë të kësaj force politike.
Lejimi i takimeve me depuetët, pasi siç ju keni konstatuar me të drejtë, ndalimi i këtyre takimeve ka qenë i paligjshëm dhe i parregullt nga Drejtoria e Burgjeve.
Në pamundësi për të ardhur dhe për t’ju takuar në zyrën tuaj, unë ju mirëpres në çdo kohë, nëse ju e gjeni atë për të biseduar edhe çështje të tjera që kanë të bëjnë jo vetëm me standardet e paraburgimit, por edhe të vetë gardianëve dhe të punonjësve të burgjeve, që janë edhe më të vështira.
Të mos harrojmë se nuk ka vetëm të paraburgosur, të cilët fatkeqësisht janë të shumtë që kanë humbur jetën për arsye shëndetësore apo që kanë vrarë veten, po për fat të keq kemi patur edhe raste të gardianëve që kanë bërë vetëvrasje.
Edhe njëherë, duke ju falenderuar për dërgimin e përfaqësuesit tuaj të Komitetit të Helsinkit në qelinë time dhe duke shpresuar në mirëkuptimin tuaj në bërjen publike të kësaj letre, me qëllimin e vetëm që përmes transparencës, të përgënjeshtroj të gjitha të pavërtetat që ju janë raportuar juve dhe Komitetit të Helsinkit nga autoritetet përgjegjëse për shkeljen e të drejtave të mia, njerëzore dhe politike, të cilat m’i garanton Kushtetuta e Republikës së Shqipërisë dhe Konventa Europiane e të Drejtave të Njeriut, ju shpreh konsideratën më të lartë për ju dhe për Komitetin Shqiptar të Helsinkit.
Artikuj te sugjeruar
POLITIKE
14 Prill16:29
Samiti i Diasporës/ Zhupa: U kthye në propagande elektorale, me sllogane partiake
Kryetarja e komisionit të Diaporës në kuvend, Ina Zhupa foli në hapje të Komisionit të Diasporës për samitin që po ...
POLITIKE
14 Prill16:23
‘Rama ka shpopullur Shqipërinë’, Boçi: Samiti i diasporës, fasadë për të fshehur pastrimin e parave të pista të qeverisë
Nënkryetari i Partisë Demokratike, Luciano Boçi, ka lëshuar akuza të forta ndaj qeverisë, duke e cilësuar Samitin e Diaspor...
POLITIKE
14 Prill13:38
“Rama dhe Lubi Balluku, si legjenda ‘një i vdekur me të gjallë'”, Berisha: Shkojnë bashkë si binom hajdutësh! Do marrin atë që meritojnë!
Kreu i Partisë Demokratike, Sali Berisha, ka ashpërsuar tonet ndaj kryeministrit Edi Rama dhe ish-zëvendëskryeministres Belinda Balluku, d...
POLITIKE
14 Prill12:48
Bylykbashi te Ligjet: Kriza e çmimeve po rëndon familjen shqiptare, qeveria të pezullojë taksat
Deputeti i PD Oerd Bylykbashi, duke folur në Komisionin e Ligjeve ngriti shqetësimin për rritjen e çmimeve të karburantit dhe produ...
POLITIKE
14 Prill11:50
“Rama shpalli veten dhe Ballukun të paprekshëm në Kuvend”, Këlliçi: Sillet sikur 12 marsi s’ka ndodhur, duhet të përballet me drejtësinë!
Deputeti i Partisë Demokratike, Belind Këlliçi, ka reaguar ashpër përmes një postimi publik në rrjetet sociale, duke hedh...
POLITIKE
14 Prill11:09
Shpëtoi Ballukun nga prangat, habit Rama: Në Shqipëri askush nuk është mbi ligjin!
Edi Rama ka deklaruar këtë të martë se pandëshkueshmëria sipas tij, ka marrë fund.
Nga Samiti i Diasporës, Rama ka de...
POLITIKE
14 Prill10:04
Brukseli nuk 'e ha' propagandën e Ramës/ Koka: Dështimi i integrimit në BE ka një shkak, mbrojtja e Ballukut
Gazetari Bledian Koka ka hedhur akuza ndaj qeverisë dhe kryeministrit Edi Rama, duke e lidhur ngërçin në procesin e integrimit europian ...
POLITIKE
13 Prill22:27
Vangjeli: Rama shpik armiq imagjinarë dhe kontrollon pushtetin përmes ‘biznesmenëve ideologjikë’
Analisti Lorenc Vangjeli hodhi akuza të forta ndaj kryeministrit Edi Rama, duke e akuzuar se po ndërton një strategji politike të bazuar mbi...
POLITIKE
13 Prill21:26
‘Ra Orbani, por jo shteti i tij’, Bushati: I ka të gjitha pushtetet, mund të rikthehet!
Fitorja e thellë e Peter Magyar në zgjedhjet e Hungarisë ka ngjallur një debat të gjerë në emisionin ‘Çim P...
