Është shtuar numri i qytetarëve të mbledhur përballë Kryeministrisë, ndërsa situata paraqitet e qetë, pa incidente ...
POLITIKE
Pedagogia Malaj: Studentët protestojnë edhe për vuajtjet e prindërve, realiteti është larg pritshmërive
PiranjatPërditësimi i fundit 23 Tetor 2026, 18:19
Pedagogia Nora Malaj ka komentuar protestat e studentëve, duke theksuar se kërkesat e tyre nuk janë vetëm jetike, por edhe politike. Sipas saj, protesta lidhet me zhgënjimin e qytetarëve nga hendeku mes pritshmërive të krijuara nga qeverisja dhe realitetit të përditshëm.
Malaj u shpreh se qytetarët i kanë besuar qeverisë duke i dhënë mandatin e katërt, me pritshmërinë që të ardhurat dhe nevojat e tyre të menaxhohen në përputhje me prioritetet e premtuara. Megjithatë, sipas saj, kur premtimet nuk përputhen me realitetin, zhgënjimi arrin kulmin.
“Unë nuk dua tablonë. Dua realitetin, dua pjatën e përditshme, dua bukën e përditshme që Zoti ma ka falur, po që dhe qeveria duhet të ma japë sepse të ardhurat janë të miat”, u shpreh Malaj.
Pedagogia theksoi gjithashtu se studentët dhe të rinjtë nuk protestojnë vetëm për veten, por edhe për prindërit e tyre, të cilët përballen çdo ditë me vështirësi ekonomike dhe sociale. Sipas saj, hendeku mes asaj që familjet japin dhe asaj që marrin po ndikon drejtpërdrejt në mënyrën se si po rriten brezat e rinj.
Malaj ngriti shqetësimin edhe për konfliktin mes brezave, duke përmendur vështirësitë me të cilat përballen familjet dhe mungesën e një qasjeje të integruar ndaj moshës së tretë.
Në përfundim, ajo e krahasoi politikën shqiptare me historinë e Penelopës dhe ndërtimin e kalasë së Rozafës, duke argumentuar se ajo që ndërtohet gjatë ditës shpesh prishet gjatë natës.
“Problemi është kur do jemi pjesë e zgjidhjes, se deri më tash kemi qenë pjesë e problemit”, përfundoi Malaj.
