Përfundon seanca gjyqësore ndaj tre të arrestuarve, Elden Tarja, Kristian Ymeri, i njohur edhe si “Shkambi”, dhe Vinçesk Pir...
POLITIKE
“Tigrat e Korrupsionit”/ Bardhi: Fatura për TEC-et lundruese të Vlorës shkon drejt 100 milionë eurove! SPAK 2 vjet heshtje për aferën korruptive të Ballukut
PiranjatPërditësimi i fundit 12 Tetor 2026, 18:17
Kryetari i Grupit Parlamentar të Partisë Demokratike, Gazment Bardhi, ka reaguar për kontratën e re prej 18.6 milionë eurosh, pa TVSH, të shpallur nga Korporata Elektroenergjetike Shqiptare (KESH) për operimin dhe mirëmbajtjen e dy termocentraleve lundruese të Vlorës, të njohura si “Tigrat”.
Në reagimin e tij, Bardhi e cilëson kontratën si një tjetër fazë të asaj që ai e quan aferë korruptive, duke pretenduar se kostot totale të projektit po i afrohen 100 milionë eurove.
Sipas deputetit demokrat, kontrata e re parashikon operimin dhe mirëmbajtjen e dy termocentraleve për dy vitet e ardhshme, ndërsa shpenzimet për karburantin dhe zëra të tjerë mbulohen veçmas nga KESH.
Bardhi thotë se rreth 70 milionë euro janë paguar tashmë për projektin, ndërsa energjia e prodhuar nga termocentralet ka kushtuar rreth 675 euro për megavat-orë, krahasuar me 111 euro për megavat-orë në periudhën e çmimeve kulmore të bursës, sipas shifrave të paraqitura prej tij.
Ai thekson se, me kontratën e re, fatura për dy termocentralet lundruese mund të arrijë në afro 100 milionë euro, duke vënë në pikëpyetje nevojën dhe përfitimin publik nga ky investim.
REAGIM I KRYETARIT TË GRUPIT PARLAMENTAR TË PD, GAZMENT BARDHI
Tigrat 1 dhe 2, një kontratë e re për një aferë të vjetër korruptive!
Duke më përjashtuar për 60 ditë nga Parlamenti, në kundërshtim me Rregulloren, Edi Rama mendon se do të më mbyllë gojën për korrupsionin e qeverisjes së tij, që po shkatërron jetën e shqiptarëve.
Rasti i “Tigrave të Vlorës”, dy karakatina lundruese që po u kushtojnë shqiptarëve mbi 100 milionë euro, është një tjetër arsye pse nuk do të hesht.
Sot, Edi Rama ka çuar më tej aferën korruptive të nisur me kontratën e firmosur nga Belinda Balluku për dy termocentralet lundruese të Vlorës.
KESH ka shpallur fituesin e një tenderi të ri prej 18.6 milionë eurosh, pa TVSH, për operimin dhe mirëmbajtjen e dy Tigrave, gjatë dy viteve të ardhshme. Pra, një kontratë e re milionëshe për të mbajtur në funksion dy termocentrale që Shqipërisë nuk i duhen. Dhe kjo nuk është fatura përfundimtare: karburanti dhe shpenzimet e tjera që mbulohen veçmas nga KESH do t’u shtohen parave që shqiptarët duhet të paguajnë për favoret dhe përfitimet personale të Edi Ramës në funksion të pushtetit të tij.
Ky është akti i dytë i së njëjtës aferë korruptive.
Akti i parë nisi me kontraktimin e dy termocentraleve lundruesebnga Belinda Balluku, nën pretekstin e një krize energjetike që nuk erdhi kurrë. Për këtë aferë, kam dorëzuar në SPAK një kallëzim penal, të shoqëruar me dokumentacion zyrtar që provon paracaktimin e fituesit, garën fiktive, favorizimin e kompanisë dhe kostot e pajustifikuara.
Rreth 70 milionë euro janë paguar tashmë për këtë projekt, ndërkohë që ajo pak energji e prodhuar nga këto termocentrale ka kushtuar rreth 675 euro për MWh, kundrejt 111 eurove në pikun e çmimeve të bursës. Gjashtë herë më shtrenjtë na ka kushtuar energjia e Tigrave të Korrupsionit të Ramës dhe Balkukut.
Me kontratën e re, fatura e “Tigrave të KORRUPSIONIT” po shkon drejt 100 milionë eurove për diçka që vendit nuk i duhet dhe që nuk na sjell asnjë përfitim publik.
Sa miliona të tjera duhet të paguajnë shqiptarët që SPAK-u të veprojë?
Pse SPAK-u ngec sa herë që gjurmët e korrupsionit të denoncuar çojnë te Belinda Balluku dhe Edi Rama? Pse nuk ndjek rrugën e parave për të zbuluar kush përfiton nga këto kontrata?
Mjafton të ndiqen paratë. Aty janë edhe përgjigjet që i mungojnë SPAK-ut.
