Prindërit çojnë mësuesit në gjykatë për notat e fëmijëve, alarm në shkollat amerikane: Po na bëhet e pamundur të japim mësim

Mësuesit në Shtetet e Bashkuara po përballen me një fenomen gjithnjë e më shqetësues: prindër që nuk pranojnë notat apo vlerësimet për fëmijët e tyre dhe zgjedhin t’i zgjidhin mosmarrëveshjet përmes avokatëve dhe padive gjyqësore.

Sipas një raportimi të Wall Street Journal, presioni ndaj mësuesve është rritur ndjeshëm pas pandemisë, kur prindërit u përfshinë më shumë në procesin mësimor dhe nisën të kundërshtonin më shpesh vendimet e shkollave.

Një anketë e EdWeek, e zhvilluar në vitin 2024 me 1,500 mësues, zbuloi se katër në 10 prej tyre kishin ndier presion nga prindërit për të ndryshuar notat e nxënësve. Sipas të anketuarve, ankesat ishin veçanërisht të shpeshta nga prindër me të ardhura të larta.

Një rast që tërhoqi vëmendjen ndodhi në Nashville, ku mësuesja Samira Hardcastle vendosi të japë dorëheqjen, duke akuzuar drejtuesit e shkollës se kishin ndryshuar notën e një nxënësi për të kënaqur një prind të pakënaqur. Sipas saj, fëmija nuk kishte dorëzuar vazhdimisht një detyrë arti, por administrata i dha një mundësi tjetër për ta përfunduar.

Një tjetër përplasje përfundoi në gjykatë. Takashi Kato, drejtues i një kompanie të inteligjencës artificiale në Silicon Valley, paditi distriktin shkollor të Palo Altos pasi djali i tij mori një notë të ulët për një punim që dyshohej se ishte shkruar pjesërisht me AI.

Një program zbulimi kishte vlerësuar se 76% e punimit ishte krijuar nga inteligjenca artificiale. Mësuesi i dha nxënësit mundësinë ta rishkruante, por edhe versioni i ri u vlerësua me notën D, duke ulur rezultatin përfundimtar në C.

Babai kundërshtoi vlerësimin dhe paraqiti një dosje prej 1,162 faqesh, me të cilën pretendonte se provonte procesin e shkrimit të djalit. Ai argumentoi gjithashtu se programet e zbulimit të AI mund të diskriminojnë nxënësit që nuk e kanë anglishten gjuhë amtare.

Çështja u shndërrua në një betejë ligjore disa mujore, por Kato vendosi ta tërhiqte padinë në shtator.

Sipas ekspertëve të cituar nga gazeta, një nga arsyet kryesore që ushqen këtë fenomen është gara gjithnjë e më e fortë për t’u pranuar në universitetet prestigjioze amerikane. Prindërit druhen se edhe një notë e vetme e dobët mund të dëmtojë të ardhmen akademike të fëmijëve të tyre.

Kështu, ajo që dikur zgjidhej përmes një bisede mes prindit dhe mësuesit, po kthehet gjithnjë e më shpesh në konflikt administrativ dhe betejë në dyert e gjykatave.