Si bëhet numërimi i votave në SHBA dhe kur priten rezultatet e para?

Në Shtetet e Bashkuara, secili shtet është përgjegjës për organizimin e zgjedhjeve dhe zbaton rregullat e veta për përpunimin dhe numërimin e votave.

Disa shtete fillojnë përpunimin e votave të hedhura para Ditës së Zgjedhjeve, ndërsa të tjerat e nisin këtë proces vetëm pasi të mbyllen vendvotimet.

Zyrtarët lokalë zgjedhorë verifikojnë, përpunojnë dhe numërojnë secilën votë, në një proces të njohur si verifikimi dhe certifikimi i rezultateve zgjedhore.

Shumica e shteteve kërkojnë gjithashtu një auditim zyrtar pas zgjedhjeve, i cili përfshin numërimin manual të fletëvotimeve dhe krahasimin e tyre me rezultatet e regjistruara nga makinat e numërimit. Megjithatë, procedurat ndryshojnë nga një shtet në tjetrin.

Të gjitha shtetet dhe autoritetet lokale kanë rregulla të përcaktuara për personat që mund të marrin pjesë në këtë proces, rendin e përpunimit të votave dhe pjesët e procedurës që mund të ndiqen nga publiku.

Garat e ngushta mund ta ngadalësojnë numërimin e votave dhe të rrisin mundësinë e rinumërimeve ose sfidave ligjore.

Kur priten rezultatet e para?

Rezultatet e para pritet të fillojnë të publikohen pas orës 18:00 sipas kohës lindore në SHBA (23:00 sipas kohës GMT).

Të dhënat fillestare mund të bëhen të qarta gradualisht, ndërsa vendvotimet mbyllen në orët në vijim.

Disa shtete mund të shpallen fituese nga mediat amerikane, por në garat e ngushta parashikimet përfundimtare mund të kërkojnë më shumë kohë.

Koha kur do të bëhet i qartë rezultati i përgjithshëm do të varet nga diferenca mes kandidatëve dhe nga garat që do të përcaktojnë kontrollin e Kongresit. /Telegrafi/

Në zgjedhjet e vitit 2022, republikanët dhe demokratët vazhdonin të ishin në garë të ngushtë për kontrollin e Kongresit edhe më 9 nëntor, një ditë pas zgjedhjeve.