Toska: Rama ka lobuar në SHBA me 2 mln dollarë, përmes një biznesmeni që e detyroi Olsi Rama

Gazetari Almer Toska, ka ngritur akuza të forta lidhur me një skemë të pretenduar lobimi në Shtetet e Bashkuara të Amerikës, ku sipas tij janë paguar rreth 2 milionë dollarë për interesa politike të kryeministrit Edi Rama.

Toska pretendon se në këtë proces janë të përfshirë vëllai i kryeministrit, Olsi Rama, dhe biznesmeni Besnik Sulaj, përmes kompanisë Balkan Energy, e cila sipas dokumenteve të përmendura nga gazetari ka lidhur një kontratë me kompaninë amerikane të lobimit Ballard & Partners.

Sipas Toskës, bëhet fjalë për një kontratë me vlerë rreth 2 milionë dollarë, ndërsa pagesat dhe dokumentacioni përkatës janë deklaruar në Departamentin Amerikan të Shtetit.

“Ky investigim është me dokument. Përmes biznesmenit Besnik Sulaj, ka një kontratë të kompanisë Balkan Energy. Janë dy dokumente të rëndësishme. Këtu është lista e pagesave të bëra në Departamentin e Shtetit. Besnik Sulaj, përmes kompanive të tij, ka kontraktuar kompaninë lobuese Ballard & Partners”, deklaroi gazetari.

Ai ngriti pikëpyetje mbi arsyen se përse një biznesmen si Sulaj do të financonte një fushatë të tillë lobimi në SHBA, duke pretenduar se pagesat nuk janë kryer për interesat e tij personale të biznesit, por për interesa politike të Edi Ramës, përmes Olsi Ramës.

Toska përmendi edhe gjendjen financiare të kompanive të biznesmenit, duke pretenduar se Sulaj ka deklaruar në tatime humbje prej 1.7 miliardë lekësh. Për këtë arsye, gazetari ngriti pyetjen se nga janë siguruar paratë për të financuar lobimin në SHBA.

Një tjetër element që Toska lidhi me këtë çështje është ndërtimi i një kulle të re në zonën e Tajvanit në Tiranë, projekt i prezantuar nga kryeministri Rama gjatë muajit tetor. Sipas gazetarit, ekzistojnë dyshime se projekti mund të jetë pjesë e një marrëdhënieje përfitimesh mes biznesmenit Sulaj dhe familjes Rama, në këmbim të financimit të lobimit në SHBA.

Ai krahasoi situatën me protestat e Gezi Park në Turqi, ku qytetarët u ngritën kundër ndërhyrjeve në një hapësirë të gjelbër, duke ngritur shqetësimin për ndërtimin e kullës në zonën e parkut të Tiranës.

Gazetari përmendi gjithashtu edhe një kazino pranë Tajvanit, për të cilën tha se përflitet se është e lidhur me Olsi Ramën, duke kërkuar që këto marrëdhënie të hetohen nga institucionet përgjegjëse.

“Ky është një rast që po hetohet nga amerikanët. Këtu nuk bëhet fjalë që Sulaj ka firmosur për interesin e tij, por për Olsi Ramën, që zotëron këto para”, u shpreh Toska, duke shtuar se çështja duhet të marrë vëmendjen edhe të SPAK-ut.

Në vijim, gazetari deklaroi se pagesat për lobimin kanë nisur më 25 mars 2026 dhe se qëllimi, sipas tij, është afrimi i kryeministrit Edi Rama me administratën e presidentit amerikan Donald Trump.