Kylie Jenner përballet me padi nga ish-punonjësja, pretendon se e mbajtën të mbyllur në dollap për më shumë se një orë

Biznesmenia dhe ylli televiziv Kylie Jenner po përballet me një padi të ngritur nga ish-punonjësja e saj shtëpiake, Dinora Carolina Cambria Amaya, e cila e akuzon për trajtim të padrejtë dhe shkelje të të drejtave në vendin e punës. Në padi, ish-punonjësja pretendon se gjatë punës në rezidencën e Jenner në Los Angeles është mbyllur në një dollap për më shumë se një orë dhe se, kur kërkoi ndihmë për shkak të një ataku paniku, mbikëqyrësi i saj është tallur me të.

Sipas raportimeve nga mediat e huaja, Amaya pretendon se është kafshuar nga një qen gjatë pastrimit të banesës dhe se në një tjetër rast është dëmtuar nga aktivizimi aksidental i një spraji me piper. Ajo pretendon se nuk është paguar për orët shtesë dhe udhëtimet mes rezidencave të Jenner, ndërsa është pushuar nga puna në shkurt të vitit 2026, pasi ngriti shqetësime për mënyrën e pagesës së stafit.

Nga ana tjetër, përfaqësuesi ligjor i Kylie Jenner ka mohuar akuzat, duke i cilësuar ato të pabazuara. Ai ka deklaruar se biznesmenia do t'i kundërshtojë pretendimet në gjykatë dhe do të mbrojë qëndrimin e saj. Deri më tani, akuzat e ish-punonjëses mbeten pretendime të paraqitura në kuadër të procesit gjyqësor.