Trump deklaratë urgjente, jep sinjale për arritjen e një marrëveshjeje me Iranin

Presidenti amerikan Donald Trump sheh një dinamikë pozitive drejt përfundimit të konfliktit me Iranin, pas bisedimeve që zhvilloi më herët gjatë ditës me kryeministrin e Katarit për këtë çështje.

Megjithatë, kreu i Shtëpisë së Bardhë nuk e ka përjashtuar mundësinë e një tjetër sulmi ushtarak kundër Iranit.

Gjatë një konference të jashtëzakonshme për shtyp të mbajtur të hënën në Shtëpinë e Bardhë, Trump deklaroi se janë diskutuar shumë çështje që lidhen me Iranin. Sipas tij, në këtë fazë, ndërhyrja ushtarake nuk duket absolutisht e nevojshme, por Shtetet e Bashkuara janë të gatshme të veprojnë në çdo moment.

“Unë nuk garantoj asgjë”, theksoi presidenti amerikan.

“Veprimi ushtarak nuk duket diçka absolutisht e nevojshme, por ne jemi të gatshëm të veprojmë në çdo moment dhe për çfarëdo arsye. Po shohim një dinamikë që çon drejt përfundimit të këtij konflikti. Besoj se ai do të përfundojë mjaft shpejt”, u shpreh Trump.

Ai shtoi se edhe Arabia Saudite mbështet një zgjidhje diplomatike të konfliktit.

I pyetur nëse do të mbështeste sekretarin e Mbrojtjes, Pete Hegseth, në rast se ky i fundit do të përballej me një proces gjyqësor, Trump u përgjigj se do ta bënte këtë, pasi sipas tij ministri “ka fituar dy luftëra”.

Presidenti amerikan e cilësoi të paktën dy herë si “humbës” kongresmenin republikan Thomas Massie, i cili ka ndërmarrë nismën për procedimin e Hegseth.

Trump rikthehet te pretendimet për zgjedhjet

Gjatë konferencës, Trump u pyet edhe për rikthimin e tij te pretendimet për “zgjedhje të manipuluara”, pas deklaratave të mëparshme ku vuri në pikëpyetje rezultatin e zgjedhjeve të mesmandatit.

Për këtë çështje, presidenti amerikan dha një përgjigje të përgjithshme, duke thënë: “Mendoj se shifrat e votimit të parakohshëm ishin të tmerrshme”.

Në konferencë ishte i pranishëm edhe Dana White, drejtuesi i organizatës UFC, e cila organizon ndeshje të arteve marciale të përziera.

Trump kishte deklaruar të premten se White do të merrte detyrën e zëdhënësit të Shtëpisë së Bardhë, por një ditë më vonë e kishte cilësuar këtë deklaratë si shaka.

White iu përgjigj edhe pyetjeve të gazetarëve. I pyetur nëse i kishte thënë “jo” presidentit amerikan për këtë propozim, ai u përgjigj: “Nuk i kam thënë jo për asgjë”.

Mesazhi i Trump për vendet e Lindjes së Mesme

Më herët, në një postim në rrjetet sociale, presidenti amerikan shkroi se Katari, Arabia Saudite, Emiratet e Bashkuara Arabe, Bahreini, Kuvajti dhe vende të tjera do të preferonin ruajtjen e status quo-së, që sipas tij nënkupton vazhdimin e bllokadës së Iranit nga toka dhe deti.

Ai shtoi se Izraeli dhe e gjithë Lindja e Mesme janë të mbrojtura nga rreziku dhe kërcënimet iraniane.

“Po shohim një dinamikë pozitive drejt përfundimit të këtij konflikti dhe do të sigurohemi që interesat e Amerikës të mbrohen në çdo moment. Me përfundimin e kësaj përfshirjeje ushtarake, populli amerikan, ashtu si edhe pjesa tjetër e botës, do të jetë shumë më i sigurt dhe më i mbrojtur”, shkroi Trump. /PiranjatNews/