VIDEO/ Hajduti hyn i armatosur në dyqan, klienti e rreh barbarisht! Autori burgoset 

Një person i maskuar, i cili për pak centimetra nuk arriti të qëllonte në kokë një burrë gjatë një përleshjeje të dhunshme në një dyqan lagjeje, është dënuar me burg. Pamjet tronditëse të kamerave të sigurisë tregojnë momentin kur në një dyqan në Wood Green, në veri të Londrës, më 1 mars, dëgjohen të shtëna armësh. Mustafa Bolat, 29 vjeç, nxori një pistoletë dhe qëlloi ndaj klientit Ali Unlu, teksa situata po përshkallëzohej.

Në videon e frikshme shihet viktima duke u përleshur me autorin dhe duke e goditur disa herë me një objekt që ngjan me shishe, përpara se të dy të përplaseshin mbi disa arka me fruta. Arma, një pistoletë gjysmëautomatike e kalibrit 9 mm, model Makarov, u shkreh tri herë gjatë përleshjes. 

Në mënyrë të pabesueshme, të tre plumbat e humbën shënjestrën dhe nuk e prekën Unlun, i cili në një moment u gjend përballë tytës së armës, vetëm pak centimetra larg kokës. Bolat u akuzua më pas për tentativë vrasjeje, mbajtje të armës së zjarrit me qëllim rrezikimin e jetës, mbajtje të municionit me të njëjtin qëllim dhe mbajtje të armës për të shkaktuar frikë përmes kërcënimit me dhunë. I pandehuri u shpall i pafajshëm për tri akuzat e para, ndërsa më 17 gusht pranoi fajësinë për akuzën e katërt. Të premten, Bolat u dënua në gjykatën Old Bailey në Londër me 6 vite e 3 muaj burg. Gjatë seancës gjyqësore, ai deklaroi se nuk e kishte kuptuar që arma ishte një mjet real dhe vdekjeprurës, duke pretenduar se kishte dashur vetëm të frikësonte viktimën, raportojnë mediat britanike. 

Ai argumentoi gjithashtu se pamjet e kamerave të sigurisë tregojnë se, nëse do të kishte pasur qëllim ta vriste Unlun, mund ta kishte bërë këtë.

Bolat iu drejtua jurisë me fjalët: “Unë nuk jam përbindësh, por as engjëll. Bëj gabime si gjithë të tjerët. Ishte marrëzi të kryeja një krim kaq të rëndë. Nuk po përpiqem të mohoj krimin që kam kryer, thjesht dua të sigurohem që juria ta kuptojë se nuk jam vrasës”.

Ai i kishte shkruar gjithashtu një letër gjyqtarit, ku shprehte dëshirën për të bërë një jetë në përputhje me ligjin. Bolat ishte dënuar edhe më parë për plagosje të rëndë pas një sulmi me thikë në vitin 2017, si dhe për drejtimin e automjetit pavarësisht se i ishte ndaluar drejtimi i tij.

Prokurori Nicholas Alexander deklaroi se incidenti tregonte se Bolat ishte një person “i aftë për të përdorur një armë”. Në rastin e mëparshëm, sipas prokurorit, ai kishte nxjerrë një thikë nga dritarja e hapur e një makine dhe kishte plagosur drejtuesin e saj në këmbë dhe në kyçin e dorës.

Të premten, gjyqtari Simon Mayo hodhi poshtë pretendimet e Bolat, duke deklaruar se ishte i bindur që ai e dinte se arma ishte funksionale. Sipas gjyqtarit, qëllimi i tij kishte qenë të frikësonte dhe terrorizonte viktimën. “Pasojat mund të kishin qenë lehtësisht katastrofike. Ishte kryesisht çështje fati që askush nuk u vra apo nuk u plagos rëndë”, u shpreh gjyqtari. /PiranjatNews/