Vajza e Kim Jong-un shfaqet gjithnjë e më shpesh në publik, shihet si pasardhësja e mundshme e liderit të Koresë së Veriut

Shfaqjet e shpeshta publike të Kim Jong-un me vajzën e tij kanë shtuar dyshimet se Koreja e Veriut po përgatit një tjetër trashëgimi familjare të pushtetit. Për Kim Yumin, një grua që u arratis nga vendi tre vjet më parë, ky ishte një tjetër sinjal se regjimi po planifikonte të vazhdonte sundimin e dinastisë Kim, këtë herë përmes vajzës së liderit, Kim Joo-e.

Kim Yumi, 32 vjeçe, e cila tashmë jeton në Seul, rrëfen se kishte ndjerë zhgënjim dhe shqetësim sa herë që televizioni shtetëror transmetonte pamje të Kim Jong-un me të bijën. Ajo ishte zemëruar edhe më parë nga masat e ashpra të vendosura gjatë pandemisë, të cilat kishin shkatërruar biznesin e peshkimit të familjes së saj. Për këtë arsye, vendosi të largohej nga vendi së bashku me të afërmit, duke udhëtuar me një varkë drejt Koresë së Jugut.

“Unë dhe burri im nuk donim që fëmijët tanë të jetonin nën një diktaturë të gjeneratës së katërt. Si prindër, menduam se gjëja më e mirë që të bënim për fëmijët tanë ishte t’u ofronim atyre liri”, tha ajo.

 Koreja e Veriut nuk toleron kundërshtimin ndaj regjimit dhe ndëshkon rëndë ata që tentojnë të largohen nga vendi. Edhe dy kalimet e mëparshme të pushtetit brenda familjes Kim, fillimisht nga Kim Il-sung te djali i tij Kim Jong-il në vitin 1994 dhe më pas nga ky i fundit te Kim Jong-un në vitin 2011, nuk u shoqëruan me reagime publike.

Këtë herë, megjithatë, vëmendja është përqendruar te vajza e liderit, e cila prej fundit të vitit 2022 është shfaqur dhjetëra herë në krah të të atit, në aktivitete të rëndësishme shtetërore, përfshirë testet e raketave dhe paradat ushtarake.

 Për vajzën e Kim Jong-un dihet shumë pak. Ajo besohet të jetë rreth 13 vjeçe dhe të quhet Kim Joo-e. Media shtetërore e ka cilësuar si fëmijën “më të dashur” dhe “më të respektuar” të liderit, ndërsa në pamjet e publikuara ajo shfaqet në pozicione të rëndësishme pranë të atit.

Në disa raste, zyrtarë të lartë ushtarakë janë parë duke u përkulur para saj, ndërsa vendosja e saj në krah të Kim Jong-un gjatë aktiviteteve zyrtare ka shtuar spekulimet për rolin që mund të ketë në të ardhmen.

Agjencia e inteligjencës së Koresë së Jugut e konsideron atë kandidaten kryesore për të pasuar të atin. Të njëjtin vlerësim ndajnë edhe tetë nga 11 dezertorët e intervistuar nga Associated Press, të cilët mbajnë kontakte me njerëz brenda Koresë së Veriut ose kanë përjetuar më herët kalimet e pushtetit. Tre të tjerë janë më skeptikë, duke përmendur kulturën thellësisht patriarkale të vendit.

Tae Yong-ho, ish-diplomat i Koresë së Veriut në Londër, i cili u arratis drejt Koresë së Jugut në vitin 2016, thotë se trajtimi që zyrtarët e lartë i rezervojnë vajzës së Kim Jong-un ngjan me protokollet që janë përdorur më parë për përgatitjen e një pasardhësi.

Edhe Kang Mi-jin, një tjetër dezertore që drejton një kompani analizash ekonomike për Korenë e Veriut, thotë se kontaktet e saj brenda vendit i kanë përcjellë të njëjtin perceptim përmes telefonave të kontrabanduara. Sipas tyre, Kim Joo-e shihet si personi që mund të marrë drejtimin e vendit pas të atit.

Identiteti i saj u bë publik fillimisht nga ish-ylli i NBA-së, Dennis Rodman, i cili e mbajti në krahë gjatë vizitës së tij në Phenian në vitin 2013, kur ajo ishte ende foshnjë.

Megjithatë, mundësia që Kim Joo-e të bëhet udhëheqësja e ardhshme e vendit mbetet e paqartë, kryesisht për shkak të rolit të kufizuar të grave në strukturat më të larta të pushtetit në Korenë e Veriut.

Gratë janë shumë pak të përfaqësuara në drejtimin politik dhe institucional të vendit. Sipas Ministrisë së Unifikimit të Koresë së Jugut, vetëm një nga 17 drejtuesit e departamenteve të Partisë së Punëtorëve është grua, motra e Kim Jong-un, Kim Yo-jong, e cila konsiderohet një prej figurave më me ndikim në regjimin e Phenianit.

Disa dezertorë shprehin dyshime se shoqëria koreano-veriore do ta pranonte lehtësisht një grua në krye të shtetit. Lee Si-jung, e cila drejton radion “Free North Korea” në Seul, thotë se disa prej kontakteve të saj më të vjetra brenda vendit nuk e shohin pozitivisht këtë mundësi.

Megjithatë, ajo thekson se në Korenë e Veriut familja Kim trajtohet si një dinasti me status pothuajse hyjnor, çka mund ta bëjë më pak të rëndësishëm faktin nëse pasardhësi është burrë apo grua.

Ekspertët vlerësojnë se Kim Jong-un, 42 vjeç, ka gjasa të zgjedhë një prej fëmijëve të tij për të vazhduar dinastinë familjare. Zyrtarët e Koresë së Jugut besojnë se lideri ka edhe një fëmijë më të vogël, por gjinia e tij nuk është konfirmuar.

Ndërkohë, qytetarët e zakonshëm të Koresë së Veriut nuk kanë asnjë ndikim në përcaktimin e udhëheqësit të ardhshëm. Dezertorët thonë se propaganda shtetërore, mbikëqyrja e vazhdueshme dhe frika nga ndëshkimi i pengojnë njerëzit të shprehin pakënaqësinë e tyre.

Kim Yumi thotë se vetë nuk kishte dëgjuar për vajzën e liderit deri në nëntor të vitit 2022, kur Kim Jong-un e prezantoi publikisht gjatë një vizite në një strukturë për lëshimin e raketave balistike ndërkontinentale.

“Njerëzit e zakonshëm nuk dinë absolutisht asgjë për historinë e familjes Kim. Ata as nuk përpiqen të mësojnë dhe nuk u kushtojnë vëmendje këtyre çështjeve, sepse kjo mund t’i vërë në rrezik”, u shpreh ajo.