Doneri 1 euro shkakton kaos në Gjermani, qindra të rinj përplasen me policinë, ndërhyn edhe helikopteri

Një ofertë e pazakontë për shitjen e donerit me vetëm 1 euro ka shkaktuar kaos në qytetin gjerman të Dortmundit. Qindra persona, kryesisht të rinj, u dyndën përpara një lokali të sapohapur, ndërsa situata doli jashtë kontrollit dhe përfundoi me përplasje të dhunshme me policinë.

Ngjarja ndodhi të dielën, më 8 nëntor, në rrugën Körner Hellweg, ku pronari i një lokali kishte vendosur të festonte hapjen e biznesit duke ofruar doner me një çmim simbolik prej vetëm 1 euroje.

Oferta ishte reklamuar gjerësisht në internet dhe tërhoqi menjëherë vëmendjen e qytetarëve. Sipas Policisë së Dortmundit, deri në 300 persona, shumica adoleshentë dhe të rinj, u grumbulluan përpara lokalit. Ndërkohë, pronari pretendoi se numri i pjesëmarrësve kishte arritur në rreth 1 mijë.

Për të menaxhuar fluksin e klientëve, pronari kishte kontraktuar paraprakisht një kompani private sigurie. Megjithatë, rojet nuk arritën të kontrollonin turmën, ndërsa mes personave që prisnin në radhë nisën shtyrjet dhe përplasjet.

Situata u përkeqësua kur turma nisi të pengonte edhe qarkullimin rrugor.

Rreth orës 14:15, pronari u detyrua të telefononte numrin e emergjencës 110 dhe të kërkonte ndihmën e policisë.

Me mbërritjen e efektivëve, oferta promocionale u ndërpre dhe qytetarëve iu kërkua përmes altoparlantëve të largoheshin nga zona.

Por ndërhyrja e policisë u pasua nga akte dhune.

Sipas autoriteteve gjermane, disa persona nga turma nisën të godisnin efektivët me gurë, mjete piroteknike, bombola gazi për të qeshur, një karrige dhe madje një skuter elektrik.

Një automjet policie u dëmtua pasi u godit me gurë.

Për të rivendosur rendin, autoritetet mobilizuan forca shtesë të policisë, përfshirë njësi speciale të gatishmërisë. Në operacion u angazhuan rreth 100 efektivë dhe një helikopter policie, i cili monitoroi situatën nga ajri.

Pas ndërhyrjes së forcave të rendit, turma u shpërnda dhe situata u qetësua.

Policia njoftoi se një person kundërshtoi urdhrin për t’u larguar nga zona dhe bëri rezistencë gjatë ndërhyrjes së efektivëve. Gjatë kontrollit, atij iu gjet një armë alarmi, e cila u sekuestrua. Personi u la i lirë pas përfundimit të procedurave policore.

Autoritetet nisën disa procedime penale për kundërshtim të punonjësve të policisë, prishje të rendit publik, dëmtim prone dhe fyerje.

Drejtori i Policisë së Dortmundit, Tim Frommeyer, dënoi ashpër dhunën ndaj efektivëve, duke theksuar se personat që sulmojnë policinë nuk mund të konsiderohen thjesht të rinj që kërkojnë argëtim, por autorë të veprave penale.

Policia ka sekuestruar gjithashtu pamje filmike nga vendngjarja, të cilat po analizohen për identifikimin e personave të përfshirë në sulme.

Ndërkohë, autoritetet bashkiake vendosën të ndalonin përkohësisht aktivitetin e lokalit. Hetimet do të përcaktojnë nëse pronari mban përgjegjësi për organizimin dhe menaxhimin e ofertës që shkaktoi grumbullimin masiv.

Nga 4 euro në 9 euro, doneri kthehet në simbol të shtrenjtimit të jetesës

Ngjarja ka tërhequr vëmendje edhe për shkak të çmimit jashtëzakonisht të ulët të ofruar nga biznesi.

Në Gjermani, një doner kushton aktualisht mesatarisht nga 7,50 deri në 9 euro, ndërsa përpara vitit 2020 çmimi ishte rreth 3,50 deri në 4 euro.

Rritja e kostove të energjisë, ushqimeve dhe lëndëve të para ka ndikuar ndjeshëm në shtrenjtimin e këtij ushqimi, një nga më të konsumuarit në Gjermani.

Sipas The Guardian, në vend shiten më shumë se 1,3 miliardë donerë në vit, ndërsa rritja e çmimit të tyre është kthyer në një simbol të inflacionit dhe kostos së jetesës.

Doneri, i popullarizuar nga emigrantët turq në Berlinin Perëndimor më shumë se 50 vite më parë, është sot pjesë e pandashme e kulturës ushqimore gjermane.

Madje, ky ushqim është bërë edhe objekt i një mosmarrëveshjeje mes Gjermanisë dhe Turqisë, pasi organizata turke kërkoi njohjen e tij në Bashkimin Europian si specialitet tradicional, një nismë që u kundërshtua nga Berlini dhe më pas u tërhoq.

Pas incidenteve në Dortmund, pronari i lokalit deklaroi se donerët e mbetur do t’ia dhuronte një organizate bamirëse që ndihmon personat e pastrehë.

Ajo që nisi si një ofertë promocionale për të tërhequr klientë përfundoi me ndërhyrje masive policore, procedime penale dhe mbylljen e përkohshme të biznesit.