VIDEO/ Momenti kur futbollisti përplaset për vdekje në fushë. Portieri qau në dhomat e zhveshjes, ja akuza që ngrihet ndaj tij

Policia e Spanjës njoftoi sot se ka nisur një hetim për vrasje të mundshme nga pakujdesia lidhur me vdekjen e sulmuesit të skuadrës së Tenerifes, Jesús de Miguel Almeida, i cili ndërroi jetë pas një përplasjeje në fushën e lojës me portierin e ekipit kundërshtar, gjatë një ndeshjeje të LaLiga 2.

Në njoftimin e saj, Policia Kombëtare spanjolle bëri të ditur se Njësia e Hetimit të Vrasjeve në Santa Cruz de Tenerife po shqyrton rrethanat e vdekjes, ndërsa në hetime do të përfshihen edhe prokurorët.

Autoritetet gjyqësore të Ishujve Kanarie sqaruan se hapja e një hetimi për vdekjen e De Miguel është një procedurë standarde, pasi sipas legjislacionit spanjoll, çdo vdekje që konsiderohet jo natyrale shkakton automatikisht nisjen e një hetimi gjyqësor.

Deri më tani nuk është bërë e ditur nëse portieri që u përplas me futbollistin, Jesús Owono, është thirrur zyrtarisht si i dyshuar apo nëse është ngritur ndonjë akuzë penale ndaj tij.

Sipas medias spanjolle El Cierre Digital, çelësi i çështjes do të jetë përcaktimi nëse sjellja e portierit tejkaloi rreziqet normale që shoqërojnë një aktivitet sportiv dhe nëse plotësohen kushtet për të vërtetuar ekzistencën e pakujdesisë me përgjegjësi penale.

Neni 142 i Kodit Penal spanjoll parashikon dënime nga një deri në katër vite burg për vrasjen nga pakujdesia, ndërsa forma më pak e rëndë e kësaj vepre mund të dënohet me gjobë nga tre deri në 18 muaj.

Për zbatimin e këtyre dispozitave do të jetë e nevojshme të shqyrtohen pamjet filmike të episodit, rrethanat e përplasjes, dokumentacioni mjekësor dhe lidhja shkakësore mes veprimit të portierit dhe vdekjes së futbollistit.

Përjashtimi i portierit me karton të kuq dhe vlerësimi i arbitrit se ishte përdorur forcë e tepruar përbëjnë elemente të rëndësishme, por një shkelje e rregullave të futbollit nuk përbën automatikisht provë për kryerjen e një vepre penale.

Sa i përket aspektit sportiv, Owono mund të përballet edhe me masa disiplinore. Kodi Disiplinor i Federatës Mbretërore Spanjolle të Futbollit (RFEF) parashikon pezullimin nga katër deri në 12 ndeshje për raste të caktuara të sjelljes së dhunshme gjatë lojës, kur ato shkaktojnë dëmtime të rënda.

Si pasojë e përplasjes së fortë, De Miguel pësoi arrest kardiorespirator dhe mori ndihmën e parë nga ekipet mjekësore që ndodheshin në stadium. Më pas, ai u transportua me urgjencë me ambulancë drejt spitalit, ku pavarësisht përpjekjeve të mjekëve, ndërroi jetë.

Lajmin për vdekjen e futbollistit 30-vjeçar e bëri të ditur sot klubi i Tenerifes përmes një deklarate, ku shprehu dhimbjen e thellë për humbjen tragjike.

«Nuk ka fjalë ngushëllimi, nuk ka absolutisht asgjë që mund ta lehtësojë këtë ndjenjë të thellë trishtimi. Jemi pranë familjes së tij të shkatërruar nga dhimbja, njerëzve të dashur dhe gjithë komunitetit të Tenerifes, i cili sot vajton këtë fund tragjik.

Familja e Jesús De Miguel shpreh mirënjohjen për çdo mesazh mbështetjeje që ka marrë, ndërsa kërkon me këmbëngulje respektimin e plotë të privatësisë së saj gjatë këtyre momenteve jashtëzakonisht të vështira», thuhet ndër të tjera në deklaratën e klubit spanjoll.

Portieri qante dhe lutej në dhomat e zhveshjes për jetën e Miguel

Sipas një artikulli të gazetës «AS», portieri 25-vjeçar Jesús Owono u largua nga fusha i tronditur thellë pas incidentit, ndërsa u pa duke qarë dhe duke u lutur në dhomat e zhveshjes për fatin e futbollistit kundërshtar.

Më pas, ai dyshohet se çaktivizoi llogarinë e tij në Instagram, pasi mori një numër të madh fyerjesh dhe kërcënimesh.

Nga rrethi i tij i afërt bëhet e ditur se Owono dëshironte të kontaktonte personalisht me De Miguel dhe familjen e tij përpara se të bënte ndonjë deklaratë publike.

Klubi i Andorrës shprehu ngushëllimet për humbjen e Jesús de Miguel, ndërsa konfirmoi se vijon të mbështesë portierin e tij.

Fëmijëria e vështirë dhe ëndrra për të luajtur në elitën e futbollit

Jesús Lázaro Owono Ngua Akeng ka lindur më 1 mars 2001 në Bata të Guinesë Ekuatoriale. Ai është më i madhi nga pesë fëmijët e familjes dhe u rrit në kushte të vështira ekonomike.

Fëmijëria e tij u karakterizua nga ndarja me të ëmën, e cila emigroi në San Sebastian për të punuar dhe për të siguruar të ardhura për fëmijët e saj. Ndërkohë, ai u zhvendos në Malabo, ku jetoi me një teze dhe kushërinjtë e tij, derisa arriti të ribashkohej me nënën në Spanjë, kur ishte tetë vjeç.

«Erdha duke ndjekur një ëndërr, jo për të luajtur futboll, por për të qenë pranë nënës sime», kujtonte ai vite më vonë në një intervistë për një program të LaLiga-s kundër racizmit.

Në San Sebastian ndoqi mësimet në shkollën Ibai Ikastola, mësoi gjuhën baske dhe filloi të luante futboll me shokët në sheshin e Ibaetës. Në atë periudhë, as që e kishte menduar se një ditë do të bëhej futbollist profesionist.

Jesús Owono, portieri 25-vjeçar që u përplas me Jesús de Miguel Almeida.

Karrierën në futboll e nisi si sulmues krahu, pozicion në të cilin shfrytëzonte shpejtësinë dhe aftësitë e tij fizike. Megjithatë, gjatë një stërvitjeje, ai plagosi aksidentalisht portierin e ekipit të tij dhe u ofrua ta zëvendësonte.

Ky vendim ndryshoi karrierën e tij. Ai zbuloi kënaqësinë e të luajturit mes shtyllave dhe përfundimisht u bë portier, pavarësisht dyshimeve fillestare të babait të tij, i cili shqetësohej për presionin që përjetojnë lojtarët në këtë pozicion.

Ai filloi të spikaste te Antiguoko dhe më pas kaloi në akademinë e Real Sociedad. Në vitin 2016 iu bashkua Deportivo Alaves, ku përfundoi një pjesë të madhe të formimit të tij futbollistik.

Gjithashtu, luajti për San Ignacio dhe ekipin e dytë të Deportivo Alaves, përpara se të debutonte në kategorinë e parë më 2 janar 2022, pikërisht kundër Real Sociedad.

Mungesat për shkak të COVID-19 të portierëve Fernando Pacheco dhe Antonio Sivera i krijuan mundësinë për të debutuar, nën drejtimin e trajnerit të atëhershëm të ekipit, José Luis Mendilibar.

Megjithatë, rrugëtimi i tij në futboll nuk ka qenë gjithmonë i lehtë, pasi është shoqëruar edhe me përvoja të vështira. Kur ishte i vogël, ai u përball me episode racizmi, çka e bëri të zhvillonte qëndrueshmëri psikologjike.

Momenti më i rëndësishëm i karrierës së tij erdhi me kombëtaren e Guinesë Ekuatoriale, ku aktivizohet që prej vitit 2019 dhe ka marrë pjesë në tri edicione të Kupës së Kombeve të Afrikës.

Veçanërisht e spikatur ishte paraqitja e tij në turneun e zhvilluar në Bregun e Fildishtë në vitin 2024, kur Konfederata Afrikane e Futbollit e vlerësoi si portierin më të mirë të fazës së grupeve.

Në korrik të vitit 2025, ai u transferua në formë huazimi te FC Andorra, ku arriti të fitonte vendin e titullarit.

Pas përfundimit të sezonit, më 26 gusht 2026, klubi njoftoi zyrtarisht blerjen e kartonit të tij nga Deportivo Alaves, duke i ofruar një kontratë dyvjeçare me opsion rinovimi edhe për dy sezone të tjera.

Në majin e kaluar, ai përjetoi një episod të pazakontë gjatë një ndeshjeje kundër Deportivo La Coruña, në stadiumin Riazor.

Owono gjeti disa thelpinj hudhre të vendosur pranë portës së tij dhe vendosi t'i largonte. Pas ndeshjes, ai komentoi duke qeshur se «në Afrikë këtë e quajmë magji». Siç tregoi vetë, hudhrat i kishte vënë re për herë të parë gjatë nxehjes dhe bëri shaka për praninë e tyre pasi pësoi një gol. /PiranjatNews/