Në muret pranë institucioneve qeveritare në Tiranë janë shfaqur parulla të shkruara nga studentë që protestojnë ku...
BOTA
Vrau gruan me insulinë/ Infermierja që i dha ndihmën e parë: E rikthyem në jetë, bashkëshorti nisi të godiste derën me shqelma
PiranjatPërditësimi i fundit 31 October 2026, 18:08
Ajo i mbijetoi krizës së parë hipoglicemike më 22 maj 2024, kur shërbimi i urgjencës 118 ndërhyri në banesën e saj në Bussolengo, në provincën e Veronës, pas një telefonate të bashkëshortit, Nadir Rossi, një infermier 34-vjeçar, i cili ndodhet aktualisht në burg në pritje të marrjes në pyetje nga gjykata, të hënën, më 2 nëntor.
Ai akuzohet se ka vrarë bashkëshorten e tij, Jessica Dalla Chiara, dy vite më parë, duke i administruar insulinë nëpërmjet serumit, pa arsye terapeutike, deri në shkaktimin e krizës së fundit hipoglicemike, e cila rezultoi fatale.
Por nga kriza e parë, 32-vjeçarja arriti të shpëtonte. Infermierja që mori pjesë në ndërhyrjen e urgjencës, sipas Corriere della Sera, u ka treguar hetuesve, përmes një letre anonime ku kërkonte nisjen e hetimeve, se atëherë bashkëshorti kishte reaguar në mënyrë të pazakontë kur zemra e Jessica-s rifilloi të rrihte: ai kishte nisur të godiste derën me shqelma.
Dëshmia e infermieres së urgjencës 118 në banesën në Bussolengo
"Kam dëgjuar zhurma të forta që vinin nga dera e mbyllur e dhomës, ndoshta goditje me shqelma dhe grushte. Këto goditje me siguri i kishte dhënë bashkëshorti, pasi ai ishte i vetmi person tjetër në banesë", kishte deklaruar infermierja e urgjencës përpara hetuesve, siç raporton Corriere della Sera.
"M'u duk si reagimi i dikujt që nuk ishte i kënaqur që bashkëshortja e tij ishte rikthyer në jetë", kishte shtuar ajo. Infermierja i kishte dërguar një letër anonime karabinierëve të Bussolengos, duke kërkuar që të hetohej sjellja e bashkëshortit.
Shërbimi i urgjencës 118 kishte ndërhyrë më 22 maj 2024, pas një episodi konvulsiv, i cili ishte pasuar nga arrest kardiak.
Pozita e bashkëshortit
Të hënën, më 2 nëntor, Nadir Rossi do të dalë para gjyqtares së hetimeve paraprake të Veronës, Carola Musio, për marrjen në pyetje lidhur me akuzën e vrasjes me dashje, të rënduar nga paramendimi. Rossi, i cili është baba i një vajze katërvjeçare, do të ketë mundësinë të paraqesë versionin e tij për ngjarjen.
Sipas akuzës, motivi i dyshuar i krimit lidhet me përfitimin e parave nga një policë sigurimi jete në vlerën 100 mijë euro, të cilën Jessica e kishte nënshkruar më 17 shkurt 2022, dy vite përpara vdekjes së saj.
Në ekspertizën mjeko-ligjore të dorëzuar në prokurori në vitin 2025 nga familjarët e Jessica-s, konfirmohen dyshimet që ishin ngritur edhe gjatë ekzaminimeve në spital. Ekipi mjekësor kishte dyshuar për një "administrim të insulinës ekzogjene", pra insulinë të futur në organizëm nga jashtë, pa qenë pjesë e trajtimit të zakonshëm të pacientes. /PiranjatNews/
