Shumë qytetarë i kanë mbështetur dhe shumë të tjerë mund të kenë shprehur bezdi dhe pakënaqësi kur kan&eu...
BOTA
“Do të të vras”/ Tmerr në brigjet franceze, emigranti kërcënon me thikë një person gjatë nisjes drejt Britanisë, më pas hipën në gomone
PiranjatPërditësimi i fundit 31 October 2026, 09:13
Një incident i dhunshëm është regjistruar në brigjet veriore të Francës, ku një emigrant i armatosur me thikë ka kërcënuar një person gjatë përpjekjes për t’u futur në një gomone që po bëhej gati të nisej drejt Britanisë së Madhe.
Ngjarja është filmuar në plazhin Ardelot-Plage, ku dhjetëra emigrantë po hipnin në një varkë të fryrë për të kaluar Kanalin Anglez. Në pamjet e publikuara duket momenti kur mes dy personave shpërthen një konflikt: njëri ndodhej tashmë në gomone, ndërsa tjetri po përpiqej të hipte në të. Situata përshkallëzohet kur personi që ndodhej në ujë nxjerr një thikë dhe i drejtohet me kërcënime burrit në varkë.
“Do të të vras”, dëgjohet të thotë ai, ndërsa tund armën në ajër. Një prej personave të pranishëm përpiqet ta mbajë larg, ndërsa një shtetas britanik njofton rojen bregdetare për praninë e një personi të armatosur. Përpara se t’i afrohej personit që kishte shënjestruar, emigranti duket se e hedh thikën në ujë. Megjithatë, vetëm pak minuta më vonë, ai shihet duke u ngjitur në gomone. Nuk dihet nëse varka arriti të mbërrinte në brigjet britanike.
Një tjetër gomone me ngjyrat e flamurit kurd
Incidenti vjen në një kohë kur kalimet e emigrantëve përmes Kanalit Anglez shoqërohen me tensione dhe episode të dhunshme. Një ditë më parë u raportua për një tjetër gomone të veçantë, e cila po transportonte më shumë se 20 burra pranë brigjeve të Belgjikës. Ndryshe nga varkat e zakonshme prej PVC-je të zezë, kjo gomone ishte lyer me ngjyrat e flamurit kurd: të kuqe, të bardhë dhe të gjelbër, me simbolin e diellit të verdhë. Ajo ishte nisur rreth orës 03:00 të mëngjesit nga një plazh pranë kufirit me Francën, ndërsa policia belge vëzhgonte lëvizjet.
