Tre vjet pasi kryebashkiakja e Durrësit, Emiriana Sako, premtoi rindërtimin në të njëjtin vend të pallateve të dëmtuar...
BOTA
Zbulimi tronditës në telefonat e të dyshuarve, çfarë ndodhi me Giorgos Mazonakisin në klinikën e “vdekjes”
PiranjatPërditësimi i fundit 3 Tetor 2026, 15:22
Detaje të reja po dalin nga hetimi për rrethanat e vdekjes së këngëtarit grek Giorgos Mazonakis në klinikën Karneadou në Kolonaki. Sipas raportimeve të SKAI, nga të dhënat e para të sekuestruara pas heqjes së sekretit telefonik janë identifikuar kërkime në internet që kanë tërhequr vëmendjen e hetuesve.
Në një prej telefonave të kontrolluar për rastin është kërkuar në internet shprehja “antidot për propofolin”, ndërsa në një tjetër është gjetur kërkimi “Midriazë. Çfarë duhet të bëj?”. Propofoli është një anestetik intravenoz me veprim të shpejtë. Sipas dëshmisë së anesteziologes, substanca i ishte administruar këngëtarit gjatë trajtimit.
Ndërkohë, në deklarimet e saj, mjekja Ioanna Gaka ka pretenduar se plazmafereza ishte kryer si një procedurë terapeutike dhe se manuali i pajisjes nuk përmendte kundërindikacione apo efekte anësore specifike të lidhura me gjendjen shëndetësore të Mazonakis. Ajo ka deklaruar gjithashtu se nuk kishte përjetuar më parë një incident të ngjashëm me pacientë të tjerë dhe se, nëse do ta dinte se procedura mund të rrezikonte shëndetin e këngëtarit, nuk do ta kishte kryer.
Sipas versionit të paraqitur nga mjekja, Mazonakis fillimisht kishte hezituar për shkak të kostos së trajtimit. Më pas, ai kishte pranuar pasi Gaka i kishte ofruar ta kryente procedurën pa pagesë, si dhuratë. Hetimi vijon dhe kërkimet e gjetura në telefonat e personave të përfshirë pritet të shqyrtohen në kuadër të provave të tjera për të sqaruar se çfarë ndodhi para dhe pas përkeqësimit të gjendjes së këngëtarit.
