I dënuar me vdekje, për 71-vjeçarin jepet vendimi i pazakontë pas 30 vitesh burg

Tridhjetë vjet burg. Kaq kohë ka vuajtur Douglas Stewart Carter, një 71-vjeçar i dënuar me vdekje për vrasjen e Eva Olesen, tezes së një drejtuesi të policisë, e kryer në vitin 1985. Që prej asaj kohe, burri ndodhet i burgosur në një institucion penitenciar në Utah, në Shtetet e Bashkuara, në pritje të ekzekutimit të dënimit me vdekje. Por ai nuk do të ekzekutohet kurrë.

Shkak është bërë rishqyrtimi i çështjes së tij nga autoritetet gjyqësore, të cilat kanë përcaktuar se provat e ADN-së nuk e lidhin atë me krimin. Për këtë arsye, një gjykatës shtetëror ka urdhëruar lirimin e menjëhershëm të tij.

Vrasja e vitit 1985

Lirimi i tij është bërë me kusht, pavarësisht kundërshtimeve të familjes së viktimës. Carter duhet të mbajë një byzylyk GPS ndërsa pret një gjyq të ri. Gruaja u gjet e pajetë nga bashkëshorti i saj në banesën e tyre, pjesërisht e zhveshur dhe me duart e lidhura pas shpine. Gjykata e Lartë e shtetit kishte urdhëruar rigjykim vitin e kaluar, duke përmendur veprime të parregullta nga ana e hetuesve.

Carter ka deklaruar gjithmonë se është i pafajshëm dhe ka pretenduar disa herë se rrëfimi që kishte nënshkruar i ishte marrë nën presion.

Dëshmitë e rreme

Pavarësisht se nuk kishte prova materiale që e lidhnin atë me vendin e krimit, juria e dënoi mbi bazën e rrëfimit dhe dëshmive të dy dëshmitarëve, të cilët pretenduan se ai, një burrë me ngjyrë, ishte mburrur se kishte vrarë Olesen, e cila ishte e bardhë. Më vonë, të dy dëshmitarët i tërhoqën deklaratat e tyre.

Një analizë e ADN-së, e marrë 22 shtatorin e kaluar, e ka përjashtuar Carter si përputhje të mundshme me gjakun e gjetur në një dorezë dere, si dhe me materialin gjenetik të marrë nga doreza e një thike të përdorur për të goditur me thikë Olesen. Gruaja ishte qëlluar gjithashtu me armë zjarri.

Dalja nga burgu

Carter doli nga burgu në orët e vona të mbrëmjes së të hënës, më 28 shtator, i veshur me një këmishë të bardhë dhe pantallona sportive gri, ndërsa syzet i kishte varur në qafë. Pranë tij, djali i tij, Tyler Anger, shtynte një karrocë me jastëkë, batanije dhe sende personale.

Carter buzëqeshi, ndërsa njëkohësisht përpiqej të fshihte fytyrën pas disa fletëve. Ai nuk foli me pak gazetarët që ndodheshin jashtë burgut dhe hipi në një makinë së bashku me djalin dhe avokatin e tij mbrojtës. Një gjykatës e ka urdhëruar të mos ketë asnjë kontakt me familjen e Olesen. Për vitin e ardhshëm është parashikuar një gjyq i ri, i cili pritet të zgjasë dy muaj. Prokurorët e qarkut kanë bërë të ditur se kanë tërhequr njoftimin me të cilin deklaronin synimin për të kërkuar dënimin me vdekje.

Arratisja dhe arrestimi

Në prill të vitit 1985, sipas dokumenteve të gjykatës, Carter u arratis nga Utah, pasi besonte se ishte nën hetim për një çështje tjetër sulmi. Ai u arrestua në qershor të po atij viti në Nashville, Tennessee, ku nënshkroi një rrëfim gjatë marrjes në pyetje nga një detektiv. Më vonë, Carter deklaroi se kishte firmosur një rrëfim të rremë, pasi policia e kishte kërcënuar vazhdimisht. Ai u dënua me vdekje në përfundim të një procesi gjyqësor, gjatë të cilit mbrojtja nuk thirri asnjë dëshmitar. Ai u dënua sërish pas një gjyqi të ri në vitin 1992 dhe, gjatë viteve që pasuan, gjykatat e Utah-s rrëzuan një sërë ankimesh të paraqitura prej tij. Një kthesë në çështje ndodhi në vitin 2011, kur dy dëshmitarët e procesit të Carter u gjetën në Meksikë dhe treguan se u ishte thënë të gënjenin në gjykatë, në këmbim të parave dhe dhuratave nga policia. /PiranjatNews/