Mesazh i fortë nga Berlini, Merz: Nëse Ukraina bie, paqja në Evropë rrezikohet

Kancelari gjerman Friedrich Merz i cilësoi bombardimet ruse ndaj infrastrukturës civile të Ukrainës si “krime lufte që ndodhin çdo ditë”.

Merz i bëri deklaratat gjatë një konference për shtyp në Berlin me presidentin e Kazakistanit, Kassym-Jomart Tokayev. Ai siguroi se Gjermania do të vazhdojë të mbështesë Kievin, veçanërisht në forcimin e kapaciteteve të mbrojtjes ajrore.

“Nuk duhet të krijojmë iluzione: Rusia do të vazhdojë bombardimet pa skrupuj dhe shkatërrimin e infrastrukturës civile. Këto janë krime lufte që ndodhin çdo ditë”, deklaroi Merz.

Kancelari tha se Berlini po zhvillon “konsultime intensive” me partnerët evropianë përpara Këshillit të ardhshëm Evropian, më 15 dhe 16 tetor, për të shqyrtuar mundësitë për shtimin e mëtejshëm të ndihmës për Ukrainën.

“Po diskutojmë gjithashtu për ndihmë shumë konkrete për buxhetin ukrainas. Po shqyrtojmë të gjitha mundësitë për të përmirësuar mbrojtjen ajrore”, tha ai.

Sipas Merz, mbrojtja ajrore përbën aktualisht “një nga sfidat më të mëdha” për Ukrainën. Ai shtoi se po zhvillon bisedime të drejtpërdrejta me disa krerë shtetesh dhe qeverish për të mundësuar furnizime të tjera në këtë fushë.

Kancelari tha se synimi është që Kievi të përgatitet për dimrin e ardhshëm, përfshirë sigurimin e furnizimit me energji.

“Nuk do të frikësohemi. Do të vazhdojmë ta mbështesim Ukrainën, sepse dimë një gjë: Ukraina është pjesë e Evropës. Dhe nëse Ukraina bie, atëherë paqja dhe liria në të gjithë Evropën janë në rrezik”, deklaroi Merz, duke shtuar "do të bëj gjithçka që është në mundësitë e mia për ta ndihmuar këtë vend edhe gjatë një dimri që mund të jetë shumë, shumë i vështirë”.