Një marinar 24-vjeçar i Marinës Mbretërore Britanike është paraqitur në gjykatë, i akuzuar për përgatitje p&...
BOTA
Miliarderi Jeff Bezos: Inteligjenca artificiale mund të çojë në 3 ditë pune në javë
PiranjatPërditësimi i fundit 8 Tetor 2026, 18:32
Themeluesi i Amazon-it, Jeff Bezos, shpalosi të mërkurën një vizion gjithëpërfshirës për të ardhmen e Amerikës, duke thënë se inteligjenca artificiale mund t'i ndihmojë familjet të përballojnë jetesën me më pak punë.
Në një intervistë me prezantuesin kryesor politik Bret Baier në emisionin "Special Report", Bezos përshkroi ambiciet e tij për "Blue Origin" dhe inteligjencën artificiale, ndërsa kundërshtoi politikanët që i portretizojnë miliarderët si njerëz të këqij.
"Suksesi nuk është ligësi," tha Bezos.
Intervista u zhvillua në ambientet e fabrikës së "Blue Origin" në Cape Canaveral, Florida, ndërsa kanali Fox News shënonte 30-vjetorin e tij.
Bezos tha se SHBA-ja duhet të dalë fituese në garën kundër Kinës për të dërguar njerëz në Hënë, duke shprehur besimin se një ulje amerikane atje është e mundur në vitin 2028.
"Ne duhet ta parakalojmë Kinën në garën për në Hënë dhe besoj se do ta bëjmë këtë," tha ai.
Ai theksoi se NASA dhe "Blue Origin" janë të përqendruara te ky qëllim, duke pasur parasysh nevojën për dërgesa ngarkesash për të mbështetur një prani të qëndrueshme njerëzore.
"Duhet të jemi në gjendje të dërgojmë rregullisht ngarkesa në Hënë për të mbështetur një bazë hënore," tha Bezos. "Pra, ka ende shumë punë për të bërë, por ka çdo arsye për të besuar se mund të dërgojmë njerëz në Hënë në vitin 2028."
Ndërsa Marsi mbetet një destinacion, Bezos u shpreh kundër anashkalimit të Hënës, duke e përshkruar atë si "një dhuratë" për shkak të afërsisë me Tokën dhe burimeve që mund të mbështesin misionet e ardhshme.
"Ne do të shkojmë në Mars. Do t'i bëjmë të gjitha gjërat e tjera. Por fillimisht duhet të shkojmë në Hënë," tha ai.
Bezos tha se dheu hënor mund të përdoret për prodhimin e qelizave diellore dhe se oksigjeni i prodhuar në Hënë mund të shërbejë si lëndë djegëse për raketat. Qëllimi, sipas tij, duhet të jetë krijimi i një pranie afatgjatë.
"Nuk do të jetë thjesht një mision ku shkohet dhe kthehesh," tha ai. "Do të jetë një bazë hënore e vërtetë dhe e qëndrueshme." Blue Origin po përgatitet gjithashtu ta rikthejë në fluturim raketën e saj "New Glenn" në muajin dhjetor, tha Bezos, pas një shpërthimi gjatë një prove të motorit në muajin maj, për të cilin Baier dha detaje gjatë transmetimit.
Bezos e vlerësoi ekipin për riparimin e platformës së lëshimit, duke thënë se fluturimi i radhës do të transportojë "Blue Ring", një mjet i projektuar për të dërguar ngarkesa në orbita të ndryshme dhe më tej në hapësirë.
I pyetur për planet për të rritur numrin e lëshimeve nga një platformë e vetme nga 12 në 50 në vit, Bezos tha se "Blue Origin" po ndërton tri platforma shtesë. Ambiciet e tij afatgjata janë shumë më të mëdha.
"Synimi ynë është të fluturojmë çdo ditë," tha ai. "Dhe më pas, pasi të kemi arritur të fluturojmë çdo ditë, duam të fluturojmë çdo orë. Dhe më pas, pasi të fluturojmë çdo orë, duam të fluturojmë çdo minutë."
Ai pranoi se ky synim përfundimtar ngjall skepticizëm edhe te vetë ekipi i tij.
"Ata mendojnë se jam i çmendur," tha Bezos. "Por kam parë gjëra të çmendura që janë realizuar më parë."
Bezos tha se ka investuar personalisht 28 miliardë dollarë në "Blue Origin" dhe se kompania së fundmi ka siguruar 10 miliardë dollarë nga investitorë të jashtëm për herë të parë. Ai gjithashtu tha se një ofertë publike fillestare mund të realizohet pas disa vitesh.
"Nuk doja vërtet të përfshija investitorë të jashtëm derisa të isha i sigurt se do të ishte një investim i mirë për ta," tha ai.
Vizioni i tij për inteligjencën artificiale është po aq ambicioz; Bezos parashikon se rritja e produktivitetit mund t'u mundësojë disa familjeve të jetojnë me një të ardhur të vetme ose të mbajnë veten me një javë pune më të shkurtër.
“Disa njerëz gjithashtu do të vendosin: ‘E dini çfarë? Mund ta mbaj familjen time duke punuar tri ditë në javë’,” tha ai. “Kjo është ajo që nënkupton produktiviteti në ekonomi.”
Bezos argumentoi se këto përparime mund të krijojnë mungesë të fuqisë punëtore, ndërsa amerikanët zgjedhin të punojnë më pak.
“Në fakt, do të jetë e vështirë të punësosh njerëz, sepse produktiviteti në ekonomi do të bëjë që, nëse njerëzit nuk duan të kenë dy punë, nuk do të jenë të detyruar ta bëjnë këtë,” tha ai.
Baier e vuri në dyshim këtë parashikim, duke përmendur rreth 30,000 vende pune në korporatë që Amazon i kishte shkurtuar që nga fundi i vitit të kaluar.
Bezos tha se Amazon ndodhej në një “pozicion shumë të veçantë” pasi kishte zgjeruar ndjeshëm fuqinë e saj punëtore gjatë pandemisë COVID-19.
Ai i pranoi shqetësimet e publikut lidhur me ndikimin e inteligjencës artificiale (AI) te vendet e punës, por tha se nuk pajtohej me ata që parashikonin një rezultat më shqetësues.
Sa i përket kompanisë Prometheus, ku Bezos është bashkëthemelues dhe bashkë-CEO, ai tha se qëllimi është zhvillimi i një “inxhinieri të përgjithshëm artificial” që i ndihmon njerëzit t’i shndërrojnë idetë në produkte fizike.
