Në tregun e këmbimit valutor shqiptar, një dollar amerikan do të blihet sot me 80.4 lekë dhe do shitet me 81.4 lekë.
Ndërk...
BOTA
Procesi i votimit në Serbi përfundoi, Vuçiç: Do ta pranoj verdiktin e popullit, cilido qoftë ai
PiranjatPërditësimi i fundit 25 Tetor 2026, 20:23
Ish-presidenti serb, Aleksandar Vuçiç ka deklaruar se do të respektojë vullnetin e qytetarëve serbë, pavarësisht rezultatit të zgjedhjeve të parakohshme parlamentare. Ai theksoi se, në rast humbjeje, do ta njohë rezultatin, ndërsa në rast fitoreje nuk do të lejojë që ajo të vihet në diskutim.
“Shpresoj që zgjedhjet të jenë paqësore dhe të rregullta, njësoj si në këtë qendër votimi. Besoj se sonte do të kemi vullnetin demokratik të qytetarëve dhe, siç e kam thënë gjithmonë, mund të fitosh ose të humbasësh zgjedhjet. Ne gjithmonë do të sillemi me përgjegjësi, nëse humbasim, do ta njohim vullnetin e votuesve, nëse fitojmë, askush nuk do të na e heqë dhe kaq”, deklaroi Vuçiç.
Duke folur për rëndësinë e procesit zgjedhor, Vuçiç theksoi se vendimi përfundimtar u përket qytetarëve, duke iu referuar shprehjes latine “Vox populi, vox Dei”, që do të thotë “Zëri i popullit është zëri i Zotit”.
Sipas tij, zgjedhjet përfaqësojnë një moment të rëndësishëm për drejtimin politik dhe ekonomik që do të ndjekë Serbia në vitet e ardhshme. Ai njoftoi gjithashtu se pret që vlerësimet e para të rezultateve të bëhen publike gjatë mbrëmjes.
“Do të shohim se si do të vendosin njerëzit. Është e rëndësishme që njerëzit të presin, do të kemi rreth orës dhjetë, dhjetë e gjysmë se kush fitoi”, tha Vuçiç.
Kryesuesi i listës “Serbia e Bashkuar” siguroi se forca e tij politike do të paraqesë një vlerësim të rezultateve, pavarësisht përfundimit të garës.
“Ne do të japim një vlerësim të saktë të rezultateve të zgjedhjeve, nuk ka ndonjë filozofi të madhe aty, cilado qofshin rezultatet”, deklaroi ai.
Duke iu përgjigjur edhe në gjuhën angleze pyetjeve të gazetarëve të huaj, Vuçiç përsëriti se do ta pranonte humbjen nëse rezultatet do ta konfirmonin atë, ndërsa në rast të kundërt do të shpallte fitoren.
“Do të shohim sonte nëse do të jem në opozitë apo në pushtet”, përfundoi Vuçiç.
