VIDEO/ Çfarë lanë pas përmbytjet shkatërrimtare në Kretë

Kreta po përballet me një situatë të rënduar për shkak të reshjeve të dendura dhe stuhive që kanë goditur ishullin gjatë 24 orëve të fundit. Përmbytje, rrëshqitje dheu dhe dëme në rrugë e infrastrukturë janë raportuar në disa zona, ndërsa autoritetet vijojnë të jenë në gatishmëri.
Në Mylopotamos, veçanërisht në Zoniana dhe Profitis Ilias, rrugët janë mbuluar nga uji, balta dhe mbeturinat. Disa akse janë bërë të pakalueshme, ndërsa pamjet e kapura me dron tregojnë përmasat e dëmeve. Banorët e zonave të prekura janë paralajmëruar përmes mesazheve të njëpasnjëshme të 112 që të kufizojnë lëvizjet dhe të zhvendosen në zona më të larta.
Në Profitis Ilias, janë raportuar dëme të konsiderueshme në infrastrukturë dhe në rrjetin rrugor. Reshjet kanë shkaktuar gjithashtu dëme të mëdha në vreshta, ullinj dhe kultura të tjera bujqësore. Ndërkohë, në Ferma, pranë Ierapetrës, një shkëmb i madh u shkëput dhe ra mbi një automjet që po kalonte në zonë. Automjeti pësoi dëme materiale, ndërsa në vendngjarje ndërhynë ekipet e zjarrfikësve.
Situatë e vështirë raportohet edhe në Bashkinë e Amarit, ku rrëshqitjet e dheut dhe grumbullimet e ujit, gurëve e baltës kanë bllokuar disa rrugë. Trafiku është ndërprerë në akset Vistagi–Platania–Fourfoura dhe Afrates–Platania, ndërsa mbetet e mbyllur edhe rruga provinciale pranë kompleksit shkollor të Fourfouras. Ekipet e emergjencës dhe makineritë e rënda po punojnë për pastrimin e rrugëve.
Bashkia e Mylopotamos ka vënë në dispozicion një linjë telefonike 24-orëshe për të prekurit, ku banorët që kanë nevojë për strehim ose ndihmë mund të kërkojnë asistencë. Në rast rreziku të menjëhershëm, autoritetet kërkojnë ndihmë nga 112. Sipas buletinit të emergjencës të Shërbimit Meteorologjik Kombëtar, Kreta vijon të jetë nën ndikimin e reshjeve të dendura dhe stuhive, me dobësim gradual të fenomeneve gjatë natës.
Në Dodekanezë, paralajmërimi portokalli mbetet në fuqi deri të dielën në mesditë. Ndërsa, në Detin Egje priten gjithashtu erëra shumë të forta verilindore. Sipas parashikimeve të Observatorit Kombëtar të Athinës/Meteo, reshjet dhe stuhitë do të vazhdojnë në Kretë edhe të dielën, me fenomene lokale deri rreth mesditës dhe dobësim gradual më pas. Autoritetet u bëjnë thirrje banorëve dhe vizitorëve të shmangin lëvizjet e panevojshme dhe të ndjekin udhëzimet zyrtare.
Lexo edhe
BOTA
Propozimi i SHBA për Serbinë/ Eksperti: Tregon se Kongresi ndjek zhvillimet në mënyrë të pavarur nga Shtëpia e Bardhë

Protesta në të gjithë Spanjën, mijëra qytetarë në rrugë

E përdhun*an dhe thithën ketaminë nga trupi i saj/ Dëshmia tronditëse e studentes së abuzu*r nga disa burra brenda ‘vëllazërisë universit...

50-vjeçarja u mbijetoi dy dozave vdekjeprurëse, gazetari amerikan: Kam ndjekur gati 500 ekzekutime, kurrë nuk kam parë diçka si rasti i s...

VIDEO/ Rusët “ndajnë” Kievin në dysh dhe paralizojnë infrastrukturën





