Sërish debate në Gjykatën e Posaçme për çështjen e bojkotit të avokatëve. Në seancën për Ilir M...
POLITIKE
“Çdo biznes që mbyllet, një familje pa bukë”, Tabaku për Paketën Fiskale 2027: Rama po godet shtresën e mesme
PiranjatPërditësimi i fundit 29 October 2026, 16:36
Deputetja e Partisë Demokratike, Jorida Tabaku, ka kritikuar ashpër Paketën Fiskale dhe Buxhetin e vitit 2027, duke akuzuar qeverinë se po rëndon më tej barrën fiskale mbi qytetarët, bizneset e vogla dhe shtresën e mesme Tabaku deklaron se, pas 14 vitesh qeverisjeje të kryeministrit Edi Rama, shqiptarët vijojnë të përballen me taksa të larta, ndërsa masat e reja fiskale, sipas saj, do ta përkeqësojnë situatën.
Një nga shqetësimet kryesore të ngritura nga deputetja demokrate lidhet me përfshirjen e bizneseve të vogla në skemën e TVSH-së. Sipas Tabakut, kjo masë do t'i vendosë sipërmarrjet e vogla përballë dy alternativave: rritjes së çmimeve ose mbylljes së aktivitetit.
“Po çfarë kanë këta me njerëzit e punës? Çfarë kanë këta që i detyrojnë bizneset të largohen, të mbyllen e të mos kenë asnjë të ardhme? Çdo biznes i vogël sot mban një familje. Mbas çdo biznesi që mbyllet, është një familje pa të ardhura”, u shpreh Tabaku.
Deputetja u ndal edhe te profesionistët e lirë, të cilët i cilësoi si një pjesë thelbësore të shtresës së mesme. Ajo kujtoi betejën ligjore në Gjykatën Kushtetuese lidhur me taksimin e kësaj kategorie, ndërsa paralajmëroi se vendosja e TVSH-së në nivelin 21%, sipas pretendimit të saj, do të ndikojë drejtpërdrejt në koston e shërbimeve.
“Sot do të kenë 21% TVSH, duke i detyruar ata që t’i rrisin të gjitha shërbimet e tyre me 21%, gjithmonë nëse ia dalin t’i mbajnë në këmbë bizneset e tyre të vogla”, deklaroi ajo.
Një tjetër pikë e kundërshtuar nga Tabaku është ndryshimi i mënyrës së pagesës së taksës së karburantit. Sipas saj, zhvendosja e pagesës nga karburanti te automjeti nuk përbën ulje reale të barrës fiskale për qytetarët.
Tabaku hodhi poshtë edhe pretendimet për ulje taksash, duke argumentuar se masat e parashikuara do të sjellin kosto më të larta për familjet dhe bizneset duke nisur nga 1 janari 2027.
“Shoqëria shqiptare, çdo shqiptar, çdo biznes do të paguajë taksa më të larta, duke nisur nga 1 janari 2027. Për shqiptarët, thesin e rrenave. Për miqtë, thesin e miliardave”, deklaroi deputetja demokrate.
Tabaku ngriti akuza edhe për mënyrën e përdorimit të fondeve publike, duke pretenduar se një pjesë e konsiderueshme e shpenzimeve buxhetore përfitohet nga interesa të lidhura me qeverinë.
“10 miliardë euro të buxhetit, nga të cilat pothuajse gjysma është taksa e korrupsionit, ashtu siç ka qenë çdo vit. Asgjë e re”, u shpreh ajo.
