Ivi Kaso, deputeti i PD-së që ndezi flakadanë sot në parlament dhe u përjashtua për së paku ditën e sotme, ishte i ftua...
AKTUALITET
Zbardhet shkaku i shpërthimit tragjik në Athinë që u mori jetën 3 shqiptarëve. Identifikohen tre hajdutët e bakrit
PiranjatPërditësimi i fundit 29 October 2026, 19:13
Trej hajdutë bakri dyshohet se shkaktuan shpërthimin vdekjeprurës ku humbën jetën gjashtë persona. Të tre janë identifikuar tashmë nga autoritetet. Hetuesit kanë gjetur pamje filmike ku ata shfaqen duke hyrë në një ndërtesë trekatëshe disa orë para shpërthimit dhe duke dalë me vrap vetëm pak minuta më vonë, duke mbajtur me vete një copë tubi bakri. Laboratorët e Universitetit Politeknik kanë përcaktuar pikën e saktë të rrjedhjes së gazit.
Sipas informacioneve të publikuara nga protothema.gr, hetuesit e Drejtorisë për Hetimin e Krimeve të Zjarrit, pranë Shërbimit Zjarrfikës, kanë arritur në përfundimin se shpërthimi u shkaktua nga vjedhja dhe dëmtimi i një tubacioni nga tre persona, në orët e para të mëngjesit të së njëjtës ditë.
Burime pranë hetimit bëjnë me dije se nga provat e mbledhura rezulton që, disa orë para shpërthimit, tre burra, një shtetas shqiptar dhe dy grekë, iu afruan ndërtesës me qëllim vjedhjen e tubave.
Dy prej tyre hynë në godinë dhe kaluan në shkallët pa dritare, ku ndodhej matësi i gazit, me synimin për të shkëputur tubat. Gjatë përpjekjes, ata prenë njërin prej tubacioneve të furnizimit me gaz natyror, duke shkaktuar rrjedhjen.
Gazi natyror u përhap në ambientet e ndërtesës dhe u grumbullua në katin e dytë, ku banonte çifti i moshuar. Në një moment, kur gruaja u ngrit dhe, sipas dyshimeve, ndezi një çelës elektrik, ndodhi shpërthimi fatal.
Autoritetet kanë identifikuar tre personat e dyshuar, ndërsa arrestimi i tyre konsiderohet çështje orësh, sipas raportimit të medias greke.
Autobusi shkollor i shpëtoi shpërthimit për pak sekonda
Siç shihet edhe në një fotografi të publikuar nga protothema, flakët e shpërthimit janë të dukshme si në katet e sipërme, ashtu edhe në katin përdhes. Kjo shpjegohet me faktin se gazi natyror ishte përhapur në të gjithë hapësirën e ndërtesës.
Një tjetër detaj tronditës është fakti se furgoni i zi që duket në fotografi ishte një automjet transporti për nxënësit e shkollës. Ai kaloi pranë ndërtesës vetëm pak çaste përpara se godina të shpërthente, duke shmangur për mrekulli një tragjedi të mundshme edhe më të madhe.
Dy çiftet që humbën jetë kishin marrë me qira një apartament në katin e parë të ndërtesës. Florida Hoxha dhe Ian Alexander Kirkpatrick ishin martuar së fundmi dhe ndodheshin në Greqi për muajin e mjaltit, ndërsa Eris Cani dhe Florin Hoxha prisnin një fëmijë.
