Bordi i Transparencës ka caktuar çmimet e reja të naftës dhe benzinës.
Duke nisur nga dita e sotme, ora 15:00, nafta do të shite...
BOTA
Shembet “oxhaku i zanave” në Kapadokia, dy të vdekur dhe një i plagosur në Turqi
PiranjatPërditësimi i fundit 29 October 2026, 15:38
Një ngjarje tragjike është regjistruar pasditen e së enjtes në Kapadokia të Turqisë, ku një nga formacionet karakteristike shkëmbore të rajonit, të njohura si “oxhaqet e zanave”, u shemb pranë hyrjes së muzeut të hapur të Göremes. Sipas raportimeve të para nga mediat turke, nga shembja kanë humbur jetën dy persona, ndërsa një tjetër ka mbetur i plagosur. Lajmi u konfirmua nga guvernatori i provincës së Nevşehirit, Hüseyin Koç, i cili bëri të ditur se trupat e dy viktimave janë gjetur dhe personi i plagosur është transportuar në spital për të marrë ndihmën mjekësore.
“Dy persona kanë humbur jetën si pasojë e shembjes së shkëmbinjve, të shkaktuar nga një rrëshqitje dheu. Një person i plagosur është dërguar në spital për trajtim. Operacionet e kërkim-shpëtimit po vijojnë në vendngjarje”, deklaroi guvernatori. Pas incidentit, në zonë janë dërguar ekipe të shumta shpëtimi dhe ambulanca. Autoritetet po vijojnë operacionet, ndërsa shkaqet e sakta të shembjes nuk janë bërë ende të ditura.
Shembja ndodhi më 29 tetor, ditë feste kombëtare në Turqi, kur shumë qytetarë kishin shfrytëzuar pushimin për të udhëtuar drejt Kapadokias. Muzeu në ajër të hapur i Göremes është një nga atraksionet më të njohura të rajonit, i vizituar nga turistë vendas dhe të huaj. “Oxhaqet e zanave” janë formacione natyrore të krijuara nga erozioni i shkëmbinjve vullkanikë gjatë mijëra viteve. Göreme është i njohur gjithashtu për kishat dhe manastiret historike të gdhendura në shkëmbinj, ndërsa zona është pjesë e Listës së Trashëgimisë Botërore të UNESCO-s.
Pamjet e publikuara në rrjetet sociale tregojnë momentet pas shembjes së formacionit shkëmbor, ndërsa autoritetet vijojnë punën për të sqaruar rrethanat e ngjarjes.
