E zuri poshtë një pemë kokosi, gruaja padit avokatët dhe kërkon 4.5 milionë paund dëmshpërblim

Një pushim që duhej të ishte një përvojë relaksuese në një resort luksoz në Sri Lanka u shndërrua në një makth për një turiste britanike, e cila mbeti me dëmtime të përhershme pasi një pemë kokosi u rrëzua mbi të. Por historia nuk përfundoi me aksidentin. Nëntë vite më vonë, gruaja është përfshirë në një betejë të re ligjore, këtë herë kundër avokatëve të saj, nga të cilët kërkon 4.5 milionë paund dëmshpërblim.

Claire Saywell, 51 vjeçe, po pushonte me bashkëshortin e saj në hotelin me katër yje Club Hotel Dolphin, në Waikkal të Sri Lankës, në shkurt të vitit 2017. Teksa qëndronte e shtrirë në një shezlong pranë pishinës, një palmë kokosi rreth 15 metra e lartë u rrëzua papritur mbi të, duke i shkaktuar dëmtime katastrofike në të dyja këmbët.

Sipas dëshmisë së paraqitur në gjykatë, pesha e trungut i shtypi këmbët dhe ia përtheu gjunjët në drejtim të kundërt. Gruaja iu nënshtrua një ndërhyrjeje urgjente kirurgjikale në kryeqytetin Colombo, përpara se të transportohej në Britaninë e Madhe.

Pas kthimit në vendlindje, Saywell iu nënshtrua rreth dhjetë operacioneve, por nuk arriti të rikuperohej plotësisht. Dëmtimet i shkaktuan dhimbje kronike dhe kufizime të përhershme fizike, duke e detyruar të braktiste punën e saj të mirëpaguar në sektorin e sigurimeve. Gjendja shëndetësore e detyroi gjithashtu të kërkonte një banesë njëkatëshe, të përshtatshme për vështirësitë e saj në lëvizje.

Pas aksidentit, britanikja angazhoi firmën e njohur ligjore Slater and Gordon për të ngritur një padi kundër kompanisë turistike Tui, përmes së cilës kishte rezervuar udhëtimin.

Megjithatë, një gabim procedural i avokatëve bëri që çështja të rrëzohej pa u shqyrtuar në themel. Dokumentet ligjore ishin dërguar në një adresë të gabuar elektronike dhe afati për paraqitjen e vlefshme të tyre kishte përfunduar.

Për pasojë, Saywell humbi mundësinë për të kërkuar dëmshpërblim nga kompania turistike dhe vendosi të padiste vetë avokatët e saj, duke i akuzuar për neglizhencë profesionale.

Gjatë një seance paraprake në Gjykatën e Lartë të Londrës, firma Slater and Gordon pranoi gabimin procedural, por kundërshtoi kërkesën për kompensim. Sipas përfaqësuesve të saj, edhe nëse dokumentet do të ishin dorëzuar në kohë, padia fillestare kundër Tui nuk kishte gjasa të mjaftueshme për të pasur sukses.

Një tjetër pikë e rëndësishme e mosmarrëveshjes lidhet me shkakun e rrëzimit të pemës. Avokatët e firmës pretendojnë se aksidenti mund të jetë shkaktuar nga një shpërthim i papritur ere të fortë, pa përgjegjësi njerëzore.

Por mbrojtja e Saywell kundërshton këtë version. Një ekspert i pemëve, i cili kishte shqyrtuar provat, kishte konstatuar se në bazën e palmës ishin vendosur elemente metalike dhe beton për të mbajtur një linjë infrastrukturore, ndërhyrje që dyshohet se kishte dëmtuar trungun dhe kishte shkaktuar kalbëzimin e tij.

Sipas ekspertit, pemë të tilla zakonisht nuk rrëzohen nga era nëse nuk kanë dëmtime të mëparshme strukturore. Përfaqësuesit e gruas argumentojnë se kjo provë mund t'i kishte dhënë asaj mbi 90% mundësi për të fituar çështjen kundër kompanisë turistike.

Nga ana tjetër, mbrojtja e firmës ligjore pretendon se mundësia e suksesit nuk e kalonte nivelin 51%, ndërsa kundërshton edhe shumën prej 4.5 milionë paundësh të kërkuar si kompensim.

Gjykatësi John Dagnall ka lejuar përfshirjen e ekspertit të pemëve në procesin gjyqësor, duke e cilësuar çështjen si një mosmarrëveshje për humbjen e mundësisë së përfitimit të një dëmshpërblimi për shkak të neglizhencës së avokatëve.

Ndërkohë, të dyja palët po shqyrtojnë mundësinë e arritjes së një marrëveshjeje jashtë gjykatës, për t'i dhënë fund një beteje ligjore që ka nisur nga një aksident i pazakontë gjatë pushimeve dhe është shndërruar në një proces miliona paundësh./PiranjatNews/