Teksa pritet që të nisë në orën 12:00 seanca plenare e Kuvendit, qytetarët janë mbledhur jashtë godinës, ndërs...
EDITORIAL
Krimi ka “dalë sheshit”, zonja Koçiu!
PiranjatPërditësimi i fundit 11 Nëntor 2025, 18:58
Atentati i ndodhur pranë aeroportit të Rinasit, ku u vra me mbi 100 plumba, Gilmando Dani, shënon një pikë kulminante të krimit në vende publike.
Krimi ka dalë sheshit ditën për diell dhe qeveria përpiqet ta mbulojë me shoshë.
Në orët kur ministrja e Brendshme, Albana Koçiu, deklaronte me zë të lartë se “Shqipëria është një vend i sigurt”. Pas kurrizit të ministres po planifikohej një atentat, një viktimë po ndiqej dhe do finalizohej në një bilanc prej një person të pajetë dhe një tjetër në gjendje kritike. Retorika politike nuk është kurrkund në realitetin e vendit dhe oazi i paqes egziston në propagandë por jo në terrenin shqiptar.
Autorët përdorën armë zjarri kallashnikov dhe në vetëm 3 minuta nën hundën e komisariatit, dogjën mjetin e përdorur në atentatë. Një i inskenim i milimetruar në çdo minutë dhe në sinkton total, ata ishin profesionist madje më profesioniste se vetë policia që i gjuante me shkelma xhamit për ta hapur që përveç këmbës numër 43, nuk kishin asnjë mjet për automjetin e blinduar.
Nëse institucioni i sigurisë nuk garanton më parandalimin, atëherë roli i tij shndërrohet në efekt formalisht pasiv.
Deklaratat e ministres Koçiu pas ngjarjes — megjithë dënimin me fjalë të ekzekutimit — nuk e kompensojnë mungesën e reflektimit të thellë publik: si ndodhi që një makinë u godit në dalje nga aeroporti; si ishte e mundur që një operacion me mbi njëqind plumba të kryhej në heshtje në zonë të hapur; dhe cilat masa konkrete do të ndërmerren për të ndryshuar modelin e sigurisë.
Qytetari nuk kërkon vetëm fjalë — ai kërkon siguri që nuk zhduket mbas raportimeve.
Kjo ngjarje nuk është vetëm një incident kriminal; është përballje me imazhin që vendi do të tregojë — se është në kontroll, se ka rend, se institucionet janë aktive. Por kur vrasja ndodh aty ku duhej të ishte pikërisht e pamundur, ky imazh shembet.
Atentati i Rinasit është reflektim i dështimit institucional që ndodhet në sy të të gjithëve. Është koha për të mos pritur të dytë — është koha për të kërkuar llogari, për të monitoruar dhe për të kërkuar ndryshim real, jo vetëm fjalë./piranjat.al
