Egnatia kërkon fitoren e parë në Evropë! Dede me dy mungesa të rëndësishme, por rikthen Bitrin

Egnatia përballet në transfertë me Universitatea Krajova, në kërkim të fitores së parë në fazën e Konference League. Pas dy barazimeve, kampionët shqiptarë udhëtojnë drejt Rumanisë me besim, por edhe me mungesa të rëndësishme. Në dispozicion të stafit teknik rikthehet Eneo Bitri, që pritet të forcojë repartin defensiv.

Egnatia zbret në fushë për një tjetër sfidë të madhe europiane, këtë herë në transfertë ndaj Universitatea Craioves, me një objektiv të qartë: të shkruajë një tjetër faqe të bukur në historinë e saj dhe të kërkojë fitoren e parë në fazën e ligës së UEFA Conference League.

Pas dy barazimeve me Midtjylland dhe Aarhus, kampionët e Shqipërisë udhëtojnë drejt Rumanisë me besimin se mund të rivalizojnë çdo kundërshtar. 

Në stadiumin “Ion Oblemenco”, skuadra e Nevil Dedes do të kërkojë të bëjë hapin e radhës në aventurën europiane, në një përballje që pritet të jetë plot emocione dhe rivalitet.

Megjithatë, Egnatia do të ketë dy mungesa të rëndësishme. Eljon Sota dhe Ildi Gruda nuk do të jenë në dispozicion për shkak dëmtimesh. 

Veçanërisht e ndjeshme është mungesa e Grudës, një prej protagonistëve kryesorë të rrogozhinasve në Europë, me golat e tij që kanë rezultuar vendimtarë në ndeshjet e para. 

Nga ana tjetër, rikthimi i Eneo Bitrit përbën një lajm pozitiv për repartin defensiv dhe i jep më shumë alternativa stafit teknik.

Me 20 futbollistë në dispozicion, Egnatia është gati të përballet me një tjetër provë të rëndësishme. Pavarësisht mungesave, rrogozhinasit synojnë të tregojnë karakterin, forcën e grupit dhe ambicien që i kanë shoqëruar në këtë rrugëtim europian.

90 minuta emocione, luftë dhe spektakël. Egnatia kërkon fitoren e parë dhe beson se ëndrra europiane mund të vazhdojë të bëhet realitet!