Frenkie de Jong arrin kuotën e 300 ndeshjeve me Barcelonën: Gjuri nuk më shqetëson më, ndihem në formë të shkëlqyer

Frenkie de Jong ka arritur një tjetër moment të rëndësishëm në karrierën e tij te Barcelona. Mesfushori holandez ka regjistruar 300 ndeshje me fanellën katalanase, duke kontribuar me 20 gola dhe 31 asiste që prej transferimit në vitin 2019, për shumën e 75 milionë eurove.

Ai e festoi këtë arritje në fitoren 3-0 ndaj Aston Villas në Champions League, ndërsa pas ndeshjes foli edhe për gjendjen e tij fizike. De Jong siguroi se problemet me gjurin i përkasin së kaluarës dhe se aktualisht ndihet në formë të shkëlqyer.

“Jam shumë mirë, ndihem i fortë dhe i motivuar. Gjuri nuk më shqetëson fare. Ajo që ndodhi i përket së kaluarës”, deklaroi 29-vjeçari.

Megjithatë, holandezi nuk i fshehu pakënaqësitë për mënyrën se si trajtohet nga opinioni publik dhe mediat, duke lënë të kuptohet se ndaj tij ka më shumë kritika sesa ndaj futbollistëve të tjerë të skuadrës.

“Kam ndjesinë se gjithmonë ka më shumë zhurmë rreth meje sesa rreth të tjerëve. Kjo ndodh sidomos kur nuk jam në fushë, gjatë verës apo kur jam i dëmtuar. Por këto janë gjëra që nuk i kam shumë në kontroll”, u shpreh De Jong.

Mesfushori pranoi gjithashtu se preferon të luajë në qendër të fushës, edhe pse është i gatshëm të përshtatet me çdo rol që i kërkon trajneri Hansi Flick.

Në fund, ai vlerësoi edhe suksesin ndaj Aston Villas, duke theksuar rëndësinë e fitores kundër një kundërshtari që deri në atë moment kishte fituar të gjitha ndeshjet në kompeticion.