Eisenkot paralajmëron Netanyahun: Asnjë aventurë ushtarake në Iran pa u formuar qeveria e re

Një përplasje e re politike ka shpërthyer në Izrael, këtë herë me në qendër Iranin. Gadi Eisenkot i ka kërkuar Benjamin Netanyahut të shmangë ndërmarrjen e veprimeve ushtarake me rrezik të lartë, për sa kohë që ai vazhdon të drejtojë qeverinë në detyrë.

Përmes një letre drejtuar Netanyahut, lideri i partisë Yashar kërkoi vetëpërmbajtje të veçantë në vendimmarrjen për sigurinë kombëtare, deri në betimin e qeverisë së re, e cila duhet të ketë besimin e Knessetit.

Ndërhyrja e Eisenkot vjen pas raportimeve të televizionit izraelit N12 për rindezjen e mosmarrëveshjeve mes Netanyahut dhe shefit të Forcave të Armatosura të Izraelit, gjeneral-lejtnant Eyal Zamir, lidhur me mundësinë e një operacioni të ri ushtarak kundër Iranit.

Eisenkot i kërkoi kryeministrit në largim të mos ndërmarrë veprime të rrezikshme që mund të presin deri në marrjen e detyrës nga qeveria e re. Ai e paralajmëroi gjithashtu të mos vërë në provë besimin e qytetarëve te institucionet shtetërore dhe procesi i vendimmarrjes.

Përplasja merr rëndësi të veçantë pasi Izraeli ndodhet ende në një periudhë pasigurie politike, pas zgjedhjeve të 27 tetorit.

Presidenti Isaac Herzog i ka dhënë Eisenkotit mandatin për formimin e qeverisë, fillimisht për 28 ditë, me mundësi zgjatjeje edhe për 14 ditë të tjera. Deri në përfundimin e procesit, Netanyahu vijon të ushtrojë detyrën e kryeministrit.

Eisenkot i është drejtuar edhe prokurores së përgjithshme, Gali Baharav-Miara, duke kërkuar ndërhyrjen e saj për të siguruar informim të rregullt dhe të plotë mbi zhvillimet e sigurisë kombëtare dhe vlerësimet e shërbimeve të inteligjencës.

Kërkesa e tij lidhet me faktin se pas zgjedhjeve ende nuk është caktuar një kryetar i ri i opozitës, i cili, sipas legjislacionit izraelit, ka të drejtë të informohet nga kryeministri të paktën një herë në muaj.

Eisenkot argumenton se, në cilësinë e personit të mandatuar për formimin e qeverisë, duhet të ketë akses në informacionet thelbësore që lidhen me sigurinë e vendit.

Përgjigjja e Netanyahut: Siguria kombëtare është kriteri kryesor

Reagimi nga zyra e Netanyahut ishte i menjëhershëm. Në një deklaratë, ajo theksoi se të gjitha vendimet e qeverisë merren ekskluzivisht mbi bazën e sigurisë kombëtare dhe në koordinim të plotë me drejtuesit ushtarakë.

Njëkohësisht, Eisenkot u akuzua se po përpiqet të politizojë çështjet e sigurisë kombëtare, ndërsa publikimi i informacioneve mbi çështje të ndjeshme ushtarake u cilësua si i papërgjegjshëm.

Eisenkot reagoi sërish, duke ngritur pyetjen se përse Netanyahu refuzon t'i japë informacione operative përmes kanaleve zyrtare.

Ai akuzoi gjithashtu kryeministrin në detyrë se po përpiqet të shtyjë mbledhjen e Komisionit të Punëve të Jashtme dhe Mbrojtjes të Knessetit deri në javën e ardhshme.

Përplasja zhvillohet në një kohë kur kampi i Eisenkotit po fiton më shumë kontroll mbi komisionet parlamentare, por ende nuk ka siguruar shumicën e nevojshme për formimin e qeverisë.

Çështja e Iranit i ka shtuar kështu një dimension të ri përplasjes politike paszgjedhore në Izrael: kush duhet të marrë vendimet për operacionet e mundshme ushtarake gjatë një periudhe tranzicioni politik dhe cilat institucione duhet të ushtrojnë kontrollin mbi këto vendime.

Deri më tani, bëhet fjalë për mosmarrëveshje lidhur me mundësinë e një veprimi të ri ushtarak dhe jo për një vendim të konfirmuar për sulm ndaj Iranit./PiranjatNews/