Iu nënshtrua operacionit, Erion Vishkulli mesazh: Një tjetër sfidë më pret javën tjetër! Dua të rikthej dritën të shoh jetën time 

Pas ndërhyrjes së dytë kirurgjikale në Itali, Erion Vishkulli ka ndarë me ndjekësit e tij një mesazh nga spitali, ku ka bërë të ditur se ndërhyrja kirurgjikale e kryer sot ka përfunduar me sukses. 

Vishkulli ka treguar se beteja e tij nuk ka përfunduar ende, pasi javën e ardhshme e pret një tjetër ndërhyrje kirurgjikale, të cilën e cilëson si ndoshta më të rëndësishmen e gjithë këtij rrugëtimi. 

Sipas tij, operacioni i radhës lidhet drejtpërdrejt me shikimin, ndërsa shpresa e tij më e madhe është të arrijë të rikthejë dritën në jetën e tij. "Pas gjithë dhimbjeve dhe sfidave që kam kaluar, shpresa ime më e madhe është të rikthej dritën që dua të shoh në jetën time. Nuk e di çfarë më pret, por një gjë e di: nuk do të dorëzohem kurrë!", shkruan ai. Vishkulli mbeti i plagosur gjatë protestave në Tiranë gjatë muajit tetori pasi i ra një plumb gome nga ana e forcave të rendit.