Një 31-vjeçare ndërroi jetë pasi ndoqi këshillat e ChatGPT, ekspertët paralajmërojnë për rreziqet e vetëdiagnostikimit

Vdekja e një 31-vjeçareje në Shtetet e Bashkuara ka rikthyer debatin mbi rreziqet e përdorimit të inteligjencës artificiale për këshilla mjekësore. Bowen Wan u gjet e pajetë në shtëpinë e saj në Seattle, në shkurt të këtij viti, ndërsa familja pretendon se ajo kishte ndjekur udhëzimet e ChatGPT për të ndërprerë gradualisht ilaçet kundër epilepsisë, pa u konsultuar me mjekun.

Prindërit e saj kanë ngritur një padi kundër kompanisë OpenAI, duke pretenduar se këshillat e dhëna nga sistemi i inteligjencës artificiale kanë ndikuar në vendimin e vajzës së tyre. Megjithatë, përgjegjësia e kompanisë dhe lidhja shkakësore mes këshillave dhe vdekjes mbeten pretendime që duhet të shqyrtohen në procesin gjyqësor.

Rasti ka nxitur reagimin e ekspertëve, të cilët paralajmërojnë se përgjigjet e inteligjencës artificiale, edhe kur duken bindëse, nuk mund të zëvendësojnë vlerësimin e një mjeku.

Një studim i Universitetit të Oksfordit, i publikuar në revistën shkencore Nature Medicine, tregoi se modelet e inteligjencës artificiale identifikonin saktë gjendjet mjekësore në 94.9% të rasteve kur testoheshin drejtpërdrejt. Por kur 1,298 qytetarë përdorën këto mjete për të vlerësuar skenarë shëndetësorë, saktësia ra nën 34.5%.

Sipas studiuesve, problemi qëndron te fakti se përdoruesit shpesh nuk dinë çfarë informacioni duhet të japin dhe nuk janë gjithmonë në gjendje të dallojnë një përgjigje të saktë nga një e gabuar.